آه يا وجع
ــــــــــــــــ
لملمت كل الوجع وحبيته فى جنابى
وطويت عليه قهرتى من غدر احبابى
ياللى تبيع الأمل قولى الوقيه بكام
الصبر منى نفد ولا عادش فيها كلام
كل اللى كان عزوتى ايام ما كان فيه وز
باعنى بلاش واشترى اهل الغنى والعز
الاصل لو يتشروه بالحمل والقنطار
كان كل جحش اشترى ينكر بأنه حمار
ايه اللى خلى القوى يستقوى بفلوسه
إلاّ اللّى طاطى قوى للندل ويبوسه
قالوا اللى عاشها اسد بيموت وصيته يعيش
واللى يعيشها حمل ياكلوه بطاولة عيش
كار التجارة فسد لما الضمير نسيوه
واللى يصون كلمته ينجح ولو حسدوه
يا مصيّتين العويل رافعين له كام راية
داء السخافة نضح ع الكل بكفاية
ما ترفعوش الحقير بالكدب فوق روسكو
لاحسن يحس أنه بيه بيزين مجالسكوا
اوعاك تقول للعويل الكلب يا سيدنا
عملنا ياما مقام لكلابنا وبإيدنا
الندل لو مسّكوه فى ديوان مصالحنا
تلقاه بيعمل اسد وإن طالنا يدبحنا
لو كان فى عز الالم ما تطاطى للواطى
لو كان بإيده الدوا ما تحطلوش واطى
كلمات
عبد الرحيم على
ليست هناك تعليقات:
إرسال تعليق