👏الخروج من السبات👏
سجال بين الشاعرين
أ. صفاء الخواجة
م. محمود الحريري
-----------------------------
🏮أ. صفاء
من كتر الغدر اللي أنا شوفته
مش حاسة أمان
ولا حاسة بطعم الدنيا دي
كلها حرمان
🏮م. محمود
فيه ناس مبتعرفش الرحمة
وعايشين ف صراع
وقلوبهم مليانة بقسوة
والحب أهو ضاع
***
🏮أ. صفاء
والناس مش دارية إلا بحالها
إحساسهم مات
وعشان مصالحهم.. وطمعهم
نايمين ف سبات
🏮م. محمود
والكل يقول لك مصلحتي
ومن بعدي طوفان
ولا عنده مبادئ أو نخوة
وكأنه شيطان
***
🏮أ. صفاء
غرقان الود اللي ما بينهم
ف بحور إهمال
ولا بر وشاطيء يلحقهم
والكتف أهو مال
🏮م. محمود
والحب صبح جوه قلوبهم
وكأنه خيال
والحقد بيجري ف شراينهم
والخير أهو زال
***
🏮أ. صفاء
من كتر الحقد اللي ملانا
قلب وإحساس
اهي بارت زرعتنا الصابحة
وهجرها الفاس
🏮م. محمود
وحياتنا بقت زي الغابة
مليانة وحوش
والزرع الأخضر بقى يابس
مليان بهاموش
***
🏮أ. صفاء
أصبحنا نقلد وحاجتنا
تقسيط تتجاب
ولا عادت لإيدينا الصنعة
والعيشة هباب
🏮م. محمود
وماضينا الحافل وتاريخنا
دفنوه ف تراب
ونسينا أصولنا وأمجادنا
بقوا زي سراب
***
🏮أ. صفاء
طب امتى ح يرجع إنتاجنا
يملا الأسواق
ونصدر قطننا للخارج
و ده له عشاق!
🏮م. محمود
والله ده حلم بنحلم به
وبنتمناه
ننتج ونصدر إنتاجنا
وكله على الله
***
🏮أ. صفاء
كفانا العطلة اللي صابتنا
سبقونا هناك
وبقينا ف خيبة بنستهلك
عايشين فى هلاك
🏮م. محمود
واللهِ دي خيبة وخلتنا
ف عذاب عايشين
والعالم حوالينا بيجري
واحنا الواقفين
***
🏮أ. صفاء
الحقوا للباقي اللي معاكم
ده زمنا سباق
والشاطر هو اللي هيلحق
يانموت ف زقاق
🏮م. محمود
ماهو لازم نصحى ونتكاتف
والكل يفوق
ونعود من تاني ونتقدم
ونقب لفوق
---------------------------
كلمات الشاعرين
أ. صفاء الخواجة
م. محمود الحريري
ليست هناك تعليقات:
إرسال تعليق