عريس وعايش في الخيال
قتل عمره في جمع المال
لا فَكر يكمل دينه
بعروسه بنت حلال
ولا فَكر في يوم يمشي
بين الناس مختال
ولا مشى مره ورىَٰ حريم
وعمره ماشي بالحلال
ضيع شبابه وأصبح شيبه
وقتها فكر في بنت حلال
غَير شويه من طباعه
وأصبح للحريم ميال
وقعت عينه على صَبيه
فائقة الجمال
حَن إليها وكلمها
وقال أحلى كلام ينقال
بدأ يظبط في نفسه
لبس سلسله وأنسيال
صَبغ شعره وعمل مَاسك
لجل مايبقى ليها خيال
ياعم الحاج شوف نفسك
ضَهر اتحنى ولا الشيال
وطقم سنان ونضاره
وماشي بتحدف شمال
ربيعك ولىَٰ وفاتك
خريفك جه بجمع المال
ياريت تحترم سِنك
دي فرسه محتاجه خيال
ياريت تتوب وتتصدق
وتعمل ليوم الترحال
بلاش تضيع من هيبتك
وتَضَحك عليك العيال
المال ما يجيب صحه
ليه تتشعلق في الحبال
(((أسامه جديانه)))
ليست هناك تعليقات:
إرسال تعليق