مين هو الفيل ؟
تعبان واقف بيقول
أنا بطل مغوار
وأول مايشوف قطة
يجري زي الفار
جه يوم ولم عياله
وراح يطبل للفيل
راح الفيل ضربه بديله
راح هو مزود التطبيل
(واربع معيز وحمار)
واتجمعوا الدلاديل
قالوا نعمل إيه ؟
في إللي عمله الفيل
دا الفيل أخد أكلنا
وكمان ديله طويل
قولوا نعمل إيه ؟
مين فينا يقدر ع الفيل؟
مين يقدر ع الفيل؟؟
جه الخروف قال لهم
يالله بنا نتلموا
ونعيش في بيت الفيل
ونقول عليه عمه
ونعيش سوا في حماه
ولا نشتمه ولا نذمه
ولا نقوله ليه كده
ولا نعكر دمه
القطة جات نونوت
وجمعت القطاقيط
جات القطاقيط عيطت
وقالت للفيل ياعبيط
والقطط راحت تجري
ومسكت الفيل من ديله
قال يعني ناوية تخربشه
لحد ما تهد في حيله
سلام كبير للقطط
مع إن مالهم حيلة
لكن خربشته قال سمعت
كل عيلة الفيلة
وكل الجيران اتجمعوا
وسقفوا للقطاقيط
وقالوا لازم ولا بد
يكون ليهم بيت
لكن ماحدش سمع
الكل نام في الغيط
وهبه البوهي
ليست هناك تعليقات:
إرسال تعليق