كفاية خصام
-----------------
سجال بين الشاعرين
أ. صفاء الخواجة
م. محمود الحريري
*******************
م. محمود
الحب قَدَر ولُقانا نصيب
والشك مرض في القلب يصيب
تخاصمني ليه وتروح وتغيب
ماكفاية خصام ياأعز حبيب
أ. صفاء
بتفوتني.. وتبعد وتلاوع
وأنا قاعدة استناك واتمنى
واعد واحسب فى ليالي
واتمنى. تجيني ونتهنى!
م. محمود
ليه بس نعيش في قلق وهموم
ونكون في جحيم وخصامنا يدوم
ده العمر بيخلص يوم ورا يوم
ماكفاية خصام ياأعز حبيب
أ. صفاء
العمر اتسرسب. مارحمنا
والقلب انينه بيوجعنا
فى رجوعنا نودع أحزاننا
وكفانا اللوم من عزالنا
م. محمود
طول ماانت بعيد باشتاق لعنيك
والروح دايما بتنادي عليك
ليه بس العند الله يخليك
ماكفاية خصام ياأعز حبيب
أ. صفاء
طب يلا ماتيجي ونتعاتب
تسمع لي وأنا أسمع ونسامح
والشك بعيد.. نبعده خالص
ده عزولنا ياناس.له كلام جارح
م. محمود
أنا نفسي يعود تاني غرامنا
وتكمل مع بعض حياتنا
وياريت تنسى قلوبنا زعلها
وكفاية خصام يا اعز حبيب
أ. صفاء
ليه عاجبك نجرح فى قلوبنا
ونصيبنا نعاند ونقاوح
تعال لي نكيد ونغيظ فيهم
ونخلي بذور الهوى طارح
م. محمود
في بعادك حاسس إني غريب
والقلب مشعلل نار ولهيب
برجوعك جرح القلب يطيب
وكفاية خصام يا اعز حبيب
أ. صفاء
ح نحقق احلام نسيناها
وتغني قلوبنا وتتهادى
ناسيين للحزن وأسبابه
وبلاش فى خصامك تتمادى
م. محمود
ماتيجي نودع أحزاننا
وننور بالحب حياتنا
وننسى كمان اللي جرالنا
وكفاية خصام ياأعز حبيب
أ. صفاء
ح نودع ماضي ماكان لينا
وفى ليلنا نولع قناديله
ودموعنا تتوه وتودعنا
والفرح يكيل لنا ليله
*********************
بقلم...
أ. صفاء الخواجة
م. محمود الحريري
ليست هناك تعليقات:
إرسال تعليق