سجال "حكايات الناس"
بقلم الشاعرين
م. محمود الحريري
أ. رضا البوشي
-----------------------------
م، محمود
ـــــــــــــــــــ
للناس حكايات فيها عجايب
إن كانوا أعداء والا حبايب
حكايات بتعيش جوه قلوبنا
والحاضر يحكيها للغايب
وسواء أغراب والا قرايب
أ. رضا
----------
فوق الأمل المكسور
في بلاد الحور
مولودة حكاوي الناس
عن طفل برئ
عن خد ابيض نفسه ينباس
هنطوف ونشوف
نقطف حواديت
من جوه الكاس
م. محمود
-------
أول حكاياتنا عن الأصحاب
واللي ف مشوارهم كانوا أحباب
بس ف لحظة الحال يتغير
واحد منهم بقى ليه أنياب
خلى الأصحاب عايشين ف عذاب
أ. رضا
---------
الدنيا دي مخزن ألغاز
عفريتة جواها ألف حياة
فيها صاحب لسه ماباعش الملح
وف ضهرك حتى ف عز الآه
وصاحب بياع وحلنجي
من نص فرصة بيغشك
فايت على وشك..
١٠٠ مأساه
م. محمود
------------
حكايات وبتحصل يوم ورا يوم
خلافات ومشاكل بين أخين
واحد ظالم والتاني مظلوم
ومعدش مودة مابين الاتنين
وبكل بساطة اتقلبوا خصوم
وبسبب المال صاروا عدوين
أ. رضا
----------
حكايات مرسومة على وشوشنا
يحكيها البيه ويا الهانم
لاتنين عايشين دايما في نقار
زي المولود وسط بهايم
لو دخل الحب من الشباك
النور ع الباب يفضل دايم
م. محمود
--------------
حكايات أغرب من أي خيال
وآدي واحد أصلا كان محتال
كان لص خطير وما عنده ضمير
مرت أيام واتبَدَل الحال
ولقينا سيادته رجل أعمال
أ. رضا
.----------
آدى شاب راتبه يشتري براد
مطلوب منه أرنب واتنين
حلمه يتجوز البت سعاد
ويجيب منها عيل واتنين
عايزة الفستان ييجي من روما
الطرحة قماش من اهل الصين
ع الفيس بعتتلي اوربية
ببلاش وتشيلني في نن العين
م، محمود
---------
هاحكي حكاية إنسان مقهور
م القهر بيشرب من كوعه
والدنيا عليه دايما بتجور
والفقر يكسر ف ضلوعه
بقى عامل زي الأرض البور
بيعاني عذاب عطشه وجوعه
أ. رضا
---------
وده قلب مفيش جواه إخلاص
عايم على بحر وتل ذنوب
العمر كراسي عدت وخلاص
ولسانه يمطر بس عيوب
ربك وحده هو الرزاق هو القادر
يهدي الحيران والعاصي يتوب
م. محمود
----------
وده واحد عقله مصور له
إنه بني آدم مش عادي
وسط جيرانه وكل معارفه
يتصرف بغرور وتعالي
راح ييجي اليوم ويلاقي نفسه
عايش ف الدنيا دي وحداني
أ. رضا
----------
وده عايش زي الانغام
حالم ابيض زي الطير
زي النحلة وزي الشجرة
ع المخاليق بيفرق خير
ده اللي يطلع خير يلقاه
وياهنياله ...
اللي يفرح قلب الغير
م. محمود
---------------
واحد ف الغربة بقاله سنين
قلبه مليان أشواق وحنين
يتمنى ف يوم يرجع بلده
ويعيش تاني ف وسط حبايبه
ويارب يعود كل الغايبين
أ. رضا
----------
باحلم بالليل اسمع صوتك
رنة تليفونك مليانة اشواق وحنين
من بعد بعادك وقساوتك
وكأني ورداية تايهة جوه البساتين
طاب تنسى ازاي كوباية الشاي
انا كنت باتحامى في حضنك
وإتبعتر عقد الياسمين
م. محمود
-----------
وكمان حكايات عن ناس عاشقين
وقلوب في الحب ياناس دايبين
ناس منهم عاشوا ف هنا وسرور
وكمان منهم في عذاب عايشين
والباقي بيحبوا ومش طايلين
أ. رضا
---------
وكمان فيه ناس تلمس قلبك
في ثواني وتدخل جواه
وتلاقي الأشواق بتحاوطك
تعيش وياها ألف حياه
وناس سيرتها شبر ف شبر
وناس بتشوفها تقول الله
م. محمود
---------
حكايات الناس مالها نهاية
ورا كل باب ألف حكاية
وطول ما الكون لساه موجود
حكايات الناس بتعدي حدود
ويكون فيها كام عبرة وآية
أ. رضا
------------
حكايات الناس .. دي باب مفتوح
أسرار وحكاوي وتل جروح
قصص مرمية على الشباك
عايشة جوانا زي الروح
في قلوب زي الحجر الصوان
لا بتعشق ولا حتى بتبوح
------------------------------
بقلم :
م. محمود الحريري
أ. رضا البوشي
ليست هناك تعليقات:
إرسال تعليق