..عمري أصيل
عملت لنفسي تأشيرة و قلت لها
يا نفسي طوفي ف السما وعودي
وهاتي أمارة م السحاب والقمر
علشان أوفي أنا بِديني ووعودي
أَمشي واتفسحْ ف البلاد سواح
وادي بالموَّال وادندن علىٰ عُودي
والملم جوَّايا كل اللي ضاع مني
بعد فوات الأوان فاحس بوجودي
معلهش يا نفسي احضني ذاتي
عمرك كريمة حِنِّي عليَّا وجودي
وصاحبي النجوم ووصيها عليا
أكلمها وافكرها بندري وعهودي
شوفي الشمس ف منحنى قلبي
اخطفي نارها احرقي بها قيودي
حلمت إني زرعت الفضا بساتين
ياكرم عنبي اهديني عنقودي
طول عمري وياكي عايش أصيل
وارث جيناتي من جدودي٠!!
كلماتي:
الشاعر: حليم محمود أبو العيلة
مصر
ليست هناك تعليقات:
إرسال تعليق