"وحشتني روحي"
-----------------
وحشتني كلمة
كنت لما اسمعها افوق
وحشتني ضحكة
كنت لما باشوفها أروق
وحشتني لحظات السعادة
اللي ضاعت مني فجأة
وسابتني فـ الدنيا
حزين مخنوق ..
وحشتني نظرات الرضا
رغم الظروف
وحشتني أيام الصفا
ومكنش خوف
وحشتني أيام المحبة والهنا
والحب كان موجود
وساكن عندنا..
والحزن كان مسجون
وساكن فـ الكهوف..
وحشتني سهرة كل ليلة
واحنا بنعد النجوم
وحشتني حكاياتها الجميلة
قبل ما يغلب عيني النوم
وحشتني خفة دمها
وحشتني لمسة كفها
ووقوفها جنبي كل يوم
كانت بتعطيني الأمل
وتخاف عليا من الزعل
وتزيح من القلب الهموم
من يوم ما غابت عن عينيا
مبقيتش حاسس بالأمان
حتى النجوم زعلت عليا
ونورها مبقاش زي زمان
مش لاقي حد يحس بيا
ونسيت خلاص طعم الحنان
وبقيت فـ عز الليل بانادي
وصوتي بيرجّ المكان
وحشتني روحي ونبض حياتي
وبتوحشني كمان وكمان
-----------------------
بقلمي: م. محمود الحريري
ليست هناك تعليقات:
إرسال تعليق