وحشتني روحي"
سجال بين الشاعرين
م. محمود الحريري
م. حمدي توفيق
-----------------
🖍️م. محمود
وحشتني كلمة
كنت لما اسمعها افوق
وحشتني ضحكة
كنت لما باشوفها أروق
وحشتني لحظات السعادة
اللي ضاعت مني فجأة
وسابتني فـ الدنيا
حزين مخنوق ..
🖍️م. حمدي
ليك حق طبعاً توحشك
ماهيه أصل الذوق
كانت سعادتك وضحكتك
يوم ماتكون مخنوق
وبرضوا هتفضل
هيه الونس .. بس
أنت إضحك .. روووق
***
🖍️م. محمود
وحشتني نظرات الرضا
رغم الظروف
وحشتني أيام الصفا
ومكنش خوف
وحشتني أيام المحبة والهنا
والحب كان موجود
وساكن عندنا..
والحزن كان مسجون
وساكن فـ الكهوف..
🖍️م. حمدي
مكنتش عِشرة تعدي
كده وخلاص
كانت رواية حُب
ولسه بتتحكي للناس
ومهما عَدى الزمن
هتفضل رمز التفاني والإخلاص
***
🖍️م. محمود
وحشتني سهرة كل ليلة
واحنا بنعد النجوم
وحشتني حكاياتها الجميلة
قبل ما يغلب عيني النوم
وحشتني خفة دمها
وحشتني لمسة كفها
ووقوفها جنبي كل يوم
كانت بتعطيني الأمل
وتخاف عليا من الزعل
وتزيح من القلب الهموم
🖍️م . حمدي
مهو لازم طبعاً
يوحشك خفه دمها
مهو أصل قلبك
أنت سايبه عندها
وهيه الوحيدة
اللي كانت حافظه سرك
وأنت حافظ ... سرها
****
🖍️م.محمود
من يوم ما غابت عن عينيا
مبقيتش حاسس بالأمان
حتى النجوم زعلت عليا
ونورها مبقاش زي زمان
مش لاقي حد يحس بيا
ونسيت خلاص طعم الحنان
وبقيت فـ عز الليل بانادي
وصوتي بيرجّ المكان
وحشتني روحي ونبض حياتي
وبتوحشني كمان وكمان
***
🖍️م. حمدي
عيش بقى ياصاحبي
وربك هوه المستعان
وادعي دعاء من قلبك
تكون من أهل الجنان
ويشملها المولى بعفوه
ورضا... الرحمن
-----------------------
بقلم الشعراء:
م. محمود الحريري
م. حمدي توفيق
ليست هناك تعليقات:
إرسال تعليق