🌹البنت أمانة
🌹
سجال بين الشاعرين:
أ. صفاء الخواجة
م. محمود الحريري
--------------------------
🌹أ. صفاء
البنت الجدعة.. المصرية
محتاجة لحضن يعلمها
علشان ماهي خايفة ومحتارة
من قهر ودايما.. يلاعبها
🌹م. محمود
محتاجة اللي يدافع عنها
يحميها ويصون كرامتها
من غير ما يحاول يقهرها
يساعدها ودايما يسندها
***
🌹أ. صفاء
من غير أڤورة ح تزودها
أو خبث ولؤم يخوفها
مش عايزة الوحدة تعذبها
محتاجة تحل لمشاكلها
🌹م. محمود
حقها ترتاح من متاعبها
وتعيش مع حد يطمنها
من غير مايهينها ويجرحها
وينور بحنانه حياتها
***
🌹أ. صفاء
وتلاقي العقل اللي فاهمها
ويحس ويعرف يعاملها
مش عايزة عادتكو تعذبها
أو أمر ونهي يعجزها!
🌹م. محمود
عاوزة تحس كمان بكيانها
ومحدش يجرح مشاعرها
وتعيش مرتاحة فـ دنيتها
وتعيش مع ناس بتقدرها
***
🌹أ. صفاء
دي الأم الواعية اللي تربي
بصراحة وصدق بتغرسها
وتخلي البنت دي تحكيلها
عن كل مايمكن يضايقها
🌹م. محمود
الأم عليها عبء كبير
فـ حماية البنت وتعليمها
وتعرفها مبادئ دينها
وتكون صاحبتها وحبيبتها
***
🌹أ. صفاء
دي ذكية بجد ومعروفة
بأصالة جذر ف نضافتها
وعقيدة دينها. بتحميها
وتشرف بيتها ومجالسها
🌹م. محمود
دي البنت المصرية أصيلة
بعنيها تحافظ على بيتها
تتعب وتكافح مع زوجها
وتكون القدوة لأولادها
***
🌹أ. صفاء
احترموا دماغها وتعليمها
وبلاش الشك اللي جارحها
ابنوها وعززوا مراحلها
راح تبنوا بيوتنا بعفتها
🌹م. محمود
لازم فـ الصح نشجعها
ونثق فيها .. وندَعَّمها
وساعتها هيظهر معدنها
ونلاقي التبر فـ منجمها
***
🌹أ. صفاء
يا ابوها في حضنك ربيها
وبلاش العصبية تدينها
بالثقة تملاها ..وتملكها
اوعاك تنهرها وتحرمها
🌹م. محمود
الأب ياناس لازم يعرف
إن وجوده يعني وجودها
هو حماها وهو سندها
من غيره مايِكْمَلش طريقها
***
🌹أ. صفاء
فى الجنة ح تبني لك دارك
بس أنت تمللي ابقى أوصلها
خليك الدرع اللي حاميها
وحنانك دايما.. يغلبها
🌹م. محمود
البنت لابوها .. نبع حنان
وهو .. أمانها وعزوتها
يراعيها فـ أي مكان وزمان
ويحاول دائما يسعدها
------------------------------
بقلم الشعراء :
🌹صفاء الخواجة🌹
🌹م. محمود الحريري🌹
ليست هناك تعليقات:
إرسال تعليق