🌿 لَمَّتْنا 🌿
زمان كُنّا وإحنا صِغار
بنتعارك
ولحظة نلاقي بسمتنا
ونتصافى
قلوب مليانة حب وخير
نصلح التراب بإيدينا
ونرسم فوقه رسمتنا
شجر مرسوم، لكن أخضر
وبيت مخطوط
وجوه خطوطه لَمَّتنا
وترعة وغيط
وشجرة توت
وتحت التوتة ساقيتنا
وتور بيدور
ومَيّه سارحة في قنايتنا
بتروي الزرع
وتملا الضرع
وبنغني غناوي فرحتنا
عشان الكل هنا حاضر
وبنقول للكبير : حاضر
وننزل نحصد الغَلّة
وكتف بكتف أنا وجاري
وإيد مع إيد بنتساعد
تقوّينا جَمعتنا
وإخلاصنا يزيد في هِمّتنا
وآخر اليوم سوا بنرجع
نصلّي الفرض ونعاود
ونقعد على مصطبة بيتنا
وتيجي الجَدّة تدعيلنا
وأمي جايبة لُقمتنا:
شوية فجل مع مِلحه
وحَبّة مش م الجَرّة
وجِبنة وقِشطة من خيرنا
ومَيّه ساقعة في الزلعة
وبسم الله
تقولوا شَهْد يا إخواني
وجَدّي ينادي
هاتولي وقدّه وبسرعة
يشب النار في الراكية
وبراد شاي مع الدلّة
في حِرْف النار يتدلّى
ويغلي الشاي
وريحة قهوته زاكيّة
هتشربوا إيه يا ولادي ؟
أنا صُبّلي شاي يا جَدّي
وأخويا وأنا قهوة
هاتيلي يامّا فنجاني هنا حَدّي
تقول: حاضر يا قلب أمك
وتدعيلنا
وأحسّ بفرحة الدنيا
في عين أبويا بِلَمَّتنا
وجَدّي يقول :
يارب بدعيلك
تبارك إلنا في عيلتنا 🤲
وبالتقوى خَضِّر يا رب زرعتنا
وعَمِّر بالحلال بيتنا
وبارك يا رب جَمعتنا 🤲
ومرّت سنين واتغيّرت معالم بيتنا
لكن دعوة جَدّي لِسّه عايشة في حتّتنا
وكل ما أفتكر أيامنا ولَمّتنا
أقول 👇
يا رب ارحم مَن ربّوا وأدّبوا
وباركلنا في عيلتنا 🤲
(اللهم آمين)
خالد سعد
24/12/2018
رحمك الله يا جدي الحبيب 🌹
ورحم الله أبي وأمي وجميع من أدبونا
ليست هناك تعليقات:
إرسال تعليق