وطني
ــــــــــ
يعني إيه معنى الوطن
يعني جوه الروح سكن
يعني أمن الروح
يا سعدُه مِنْ أمَنْ
يعني حضن كبير
يطبطب ع الجميع
يعني شمس الصيف
و ضِلّاية ربيع
يعني لمّة عيلة
فيها كل معنى
وإن وجعنا يزيد
نداوى جراح وجعنا
يعني أرض وبيت وعزوة
ومجتمع لو حد فينا يبيع
ما يرضى فى يوم يبيعنا
يعني حب يجمّع الملايين
وقلب كبير يسيعنا
يعني عدل ورحمة
تملا قلوب وطيبة
يعني يبقى الكل واحد
والوحيد ما يضيعش فينا
يعني نفرح
تبقى كل الدنيا جنة
واما نحزن
تحزن الأيام علينا
الوطن جوّانا
وبيجري فى عروقنا
ان فارقناه غصب عنّا
يجري بينا لحدُّه شوقنا
وان نسينا نقول عشقنا
نلتقيه بالروح عشقنا
كل شيء يوم حس بيا
بدون ما اقولها
هو وطني
كل خير بيبان عليا
يبقى ليك الخير يا وطني
الاْمان بالقاه فى حضنك
واللي تاه من عمري عندك
أنت احساسي بكياني
وانت فيك أشعر بذاتي
وان قالولي تحب تاني
قلت وأوهب مين حياتي !
الحياة منك وليك
وان ناديت اجري عليك
كل عمري بين ايديك
من ميلادي ول مماتي
آه يا وطني
لما يوم الخوف ياخدني
والقى نفسي
الدنيا وسط النار تسيبني
والتقيك فاتح دراعك
جاي من الاحزان تاخدني
بالقى روحي ترد فيا
وألقى روحك بتجاوبني
واما يوم تيجي تعاتبني
مالتقيش فى العين دموع
ترحم كسوفي
والا الاقي فى قلبي نور
ويزيد فى خوفي
آه يا وطني ياللي فيك
عمري وشبابي
آه يا وطني ياللي فيك
فرحي وعذابي
أنت روحي وانت عمري
وكل مابي
وانت أيامي اللي جايه
وذكرياتي
آه يا وطن النيل
ووتر السمسمّية
والولاد جوه الغيطان
بإيدين عفيّة
والسواقي
لسه باقي فى القادوس
بالحب ميّة
والبنات بأجمل صفات
زاد جمالها بالسكات
أدب الصبّية
والجميع بالروح يجود
كله لاجل عيون بهية
كل حاجة فيك يا وطني
حلوة حتى إن جيت عليا
كلمات
عبد الرحيم على
ليست هناك تعليقات:
إرسال تعليق