-------------+++ أزمة شاعر +++------------
الشِّعر دَمْ قَلبِى والكَلاوِى
راكِب حَبْل سُرِّى للحَكاوِى
بَنزِينُه شَغَّل (موتور) دِماغى
(أكْتِينُه) أصْلى مِش مِخاوِى
دار وحَرَّك فى عَقل راسِى
ولهْ قِيادَه ف لسانه حاوِى
يِمْشِى دايِر والسِّكَّه واقفَه
والحٍكمَه راكبَه ع الغَناوِى
يُسوق حُروفها من قاموسنا
فاهِم سُكونها وفَتْح هاوِى
لو ضَمَّه واقفَه يدوس (فََرامِل)
زمَّارتُه تِندَه ع اللى غاوِى
حاسِب حِساب أهْل كانَ وإنَّ
صِفَه ومَوْصوف نَحْوِ الرَّشَاوِى
حَتِرْكَب مَعايا وتِنْسَى الكِنَايَه
وتْخُش بِيتِى للسَّجْع لاوِى
إوْعَى تهنِّى ف قَصِيدَه بايْخَه
زى(سوسْتَه) فى زْرَار عَرَاوِى
أو تِعَزِّى ف غِيرْها فالحَه
والجَهل عاكْمَكْ م العَكاوِى
يِخَلِّى مِنك ساقية دايْره
وَتَــد رَوِيَّك تِرْوِيه رَغَاوِى
رَكَبْ ودَارَى وِشُّه مِنِّى
غنَّى زَمْرِى يا صَبرِى داوِى
كَرَاسِى فاضْيَه فى صَالونْها
ويْرُوح يزَمَّر ف القَهاوِى
سَخَنْ (مُتورِى) رَاح مِدَخَّنْ
عَطَسْ وكَحْ الرَّاكِب بَلاوِى
ع ( الفِتِيس ) وَقََعْ قِناعُه
طَلَعْ جَنابُه نَدَّابْ عَـــزَاوِى
د. سمير خليل
ليست هناك تعليقات:
إرسال تعليق