قررت أنزل م البيت وأشوف الحال
وأِلِف وأدَوّر علي حد مبسوط البال
فوجئت بناس تايهه ومهدوده الحِيل
كل مُناها تعيش حالها بسرسوب أموال
تشوف اللقمه لأولادها تسد الجوع
لقيت الكل بيترنح ف وسط جموع
أمواج الفقر بتهاجم بشَلّال أو سِيل
الراجل حابس أنفاسه علطول موجوع
مش قادر يتفك بكلمة أو حتى يِمِيل
الكل باصص لسماه بعيون الصقر
مستنى النجده م المولي ويزول الفقر
أو يبعت أي مساعده من أي خليل
بكفايه أوجاع الراس ،،،بكفايه النَقر
جريت من حِتة علي حِتة يمكن أرتاح
لقيت المود زى مهوه بيعَذّب أرواح
واللقمه بتيجى بالعافية علي شكل فتات
الظلم المحفوف بمخاطر بقي هو مباح
والبال يتمنى يكون رايق لو حتى ساعات
والدنيا تطَلَّع ف لسانها وتبُخ حاجات
مبقتش بتطرح من طينها سنابل فُل
واخدانا رايحه علي فين يا ست الكُل؟؟
عايشين بس بأرواحنا والجِسم أهو مات
رغيف العيش إللي كان عيشنا يتاكل حاف
والجوع إللي كان مفجوع بقي خِلف خلاف
ويقولك بينه وبين نفسه لو راجل كُل
ويقولك بينه وبين نفسه لو راجل كُل
،،،إيهاب السقا،،،
ليست هناك تعليقات:
إرسال تعليق