ناس حَسَّانى
وناس مش فاهمه أسلوبي
.وناس تنسانى
عشان مش لاقيه ف جيوبى
وناس بتحب
حتى لو زِدت ف عيوبي
وناس بتسب
عشان ربايتها معيوبه
وناس عيزانى
ف عز الحَر،،، وف طوبه
وناس بِتعُك
عشان عاوزاها سبوبه
وناس كارهانى
بدون م أعرف الأسباب
وناس قاسيه
قافله ف وشي الباب
وناس ناسيه
وحاطه علي راسها تراب
وناس مِنّي
ومش مِنّي ولا أحباب
وناس شايفانى
كأنى غراب
.وناس عشقانى
بدون أسباب
وناس تانيه
بتضحك وبتداري ضحكتها
وف ثانيه
تقفل كل الماضي ف صفحتها
ومش فارقه
تضيع عليها حصتها
وناس عاميه
بتتمني أكون صعلوك
وناس ساميه
بتشيل من طريقي الشوك
وناس بتشك
حتى لو مش لاقيه شكوك
وناس راحت
وسابت سنين الغُلب
إرتاحت
وتركت جراح ف القلب
والروح ناحت
والموجب بقي جاي بالسلب
،،،،،،،،،،
،،إيهاب السقا،،
ليست هناك تعليقات:
إرسال تعليق