حيرة ضمير
ضميري خسرني كتير
خلاني فقدت التقدير
و أحن لطفل أما بيبكي
وأبكي لدموع كل كبير
والضعف اللي ف جسمه
بيجري
وسنين العمر أما تطير
وقالولي د إسمه الضعف
وزمنا ماعاد فيه الخير
فحاولت أغير من نفسي
واحدف بلساني المسامير
ماعرفتش أغير من طبعي
ولا أحوط من كل مكير
وضربت دماغي بميت
صارمه
وحاولت أعيد التفكير
وكتير أتكلم مع حالي
وحاولت أجيب ميت
تبرير
للي بيحصلي ويجرالي
وكأني كيوسف في البير
أيه اللي رماني الرميادي
لضمير مش عايز التخدير
واخويا وصاحبي اللي
رماني
علشان مابفكر في الخير
والدنيا بتضحك لحرامي
متعطر لابس في حرير
وزماني من المر سقاني
علشان بتعامل بضمير
وضميري كرباجه هراني
وملالي دماغي بمسامير
من كتر الفكر اللي ف بالي
والأدب الحارس كغفير
حالف ما أغير يوم حالي
ويكفيني فيه رب كبير
عالم بضميري وأحوالي
والقلب العمران بالخير
بقلم الشاعر فهمى محمود حجازي
ليست هناك تعليقات:
إرسال تعليق