سجال دويتو بين الشاعرين
أ. صفاء الخواجة
م. محمود الحريري
بعنوان🌹تفرق🌹
-------------------------
أ. صفاء
فارقة معانا سنينا الجاية
بعد الخبرة ف دنيا غويطة
اتعلمنا وشوفنا .. الحيرة
ويا نفوس بسوادها غميقة
م. محمود
فعلا فعلا تفرق جدا
بعد ما لفينا وجربنا
عمر الغل ماينفع أبدا
علشان نتمتع بحياتنا
أ. صفاء
فارقة نقرب أكتر وأكتر
نعرف ديننا وفرحة جنة
وصراط ويا صحايف طايرة
وقلوب خايفة ماليها الرجفة
م. محمود
فرق كبير لو كلنا نعرف
تعاليم ديننا ونستخدمها
لما قلوبنا كمان راح تنضف
نكسب آخرتنا وجنتها
أ. صفاء
فارقة نصفي النية ونصلح
بين إخواننا ..ونمنع فُرقة
نوصل رحم .. بمعروف نؤمر
وبلاش غيرة وحقد وغربة
م. محمود
برضه هتفرق لو نتوحد
ربنا هيبارك وحدتنا
نلقى طريق النور اتمهد
بالحب نزَيِّن دنيتنا
أ. صفاء
فارقة نطمن بعض ونسند
كل المايل.. ونغيث بكره
يشرق فجر ماليه الفرحة
ولسان ينطق حمده وشكره
م. محمود
فرق مابين السما والأرض
لما نكون بنساند بعض
وبيوتنا هتملاها البركة
لما نصون الدين والعرض
------------------------------
بقلم
🌹أ. صفاء الخواجة 🌹
🌹م. محمود الحريري🌹
ليست هناك تعليقات:
إرسال تعليق