بتغيبي ليه و انتي
لسة مسجلة اسمك حضور
و تسيبيني في محنتي
واقف لجانبك في الطابور
سادة بالمتاعب سكتي
منعاني ليه من العبور
انا اللي بنيتك بكفتي
عليت على ارضك قصور
كنت فاكر انك جنتي
رميتيني ليه في أرض بور
بعتيني و ضيعتي فرحتي
رضيتي خاطري يبات مكسور
و هانت عليكي دمعتي
و قبلتي فية شهادة زور
سلمتي بالهين قضيتي
و انا ليك حصن بألف سور
معقولة تبقى نهاية قصتي
عايش في وسط القبور
و لما جاتلك شكوتي
استهنتي بضعفي فوق السطور
عديتي ليه على جثتي
و أنا بأمن موكبك وقت المرور
شايل في قلب مخلتي
أحلام هتموت ماشفتش نور
و راحت خلاص فرصتي
و ضاعت في وقفة طابور
بدوي محمد
الثلاثاء ٩ يناير٢٠٢٤
ليست هناك تعليقات:
إرسال تعليق