"دستور ياسيادنا"
-----------------------
دستور دستور ياسياد دستور
ماترشوا الملح وهاتوا بخور
لو حد احتار نعمل له الزار
إن كان ملموس أو كان مسحور
وإن كنتِي ياشابة عاوزة عريس
موعودة ياللي عليكِي الدور
********
الشيخ مشكاح ربنا يخفيه
قاعد مجعوص وعامل دكتور
ويهلفط أى كلام موزون
أشتات أشتوت إصحى ياعصفور
معمول لك يابني عمل مظبوط
مربرط على عضمة ف وسط قبور
وكمان عَمَلين على راس قرموط
بيعوم ويلف في أي بحور
لازم نعمل لك زار وحجاب
وكمان ندبحلك معزة وتور
وتجيب لي جناح نحلة يتيمة
مع رِجْل غراب ويكون مشهور
********
وانتِي ياشابة ياعيني عليكِي
بيحوم حواليكِي كام دبور
ويلفوا وراكِي في كل مكان
هيسيبوا عليكِي ديب مسعور
مش هتدوقي طعم الراحة
ولا فيه فَرحة أو أي سرور
بس اطمني.. أنا راح اساعدك
واحْبِسْهُم جوه مكان محظور
بس هاتيلي بُكْرَه غويشتين
على كام إسورة وطبق بنور
********
دَالشيخ مشكاح أكبر دجال
بيلف عليكو ياناس ويدور
خَلِّي تُكَالَك يابني على الله
وانتِي يابنتي خليكِي في النور
وأنتَ يامشكاح منك لله
إبعد عننا.. ويارب تغور
-------------------------------
بقلم : م/محمود الحريري
ليست هناك تعليقات:
إرسال تعليق