سجال دويتو بين الشاعرين
أ. صفاء الخواجة
م. محمود الحريري
بعنوان " ساكتين ليه "
-------------------------
م. محمود
---------
قفل يابني خلاص شطبنا
خلص المولد بقى واتفض
ولنهايتنا خلاص قربنا
ماهي كرامتنا بقت في الأرض
أ. صفاء
----------
أسكت خالص وابعد وامشي
خلص المولد فينا ومات
اسكت وأوعى تجادل لحظة
زمن الحق ماسابنا وفات
..........
م. محمود
------------
قفل يابني ولم حاجاتك
ومعدش كلام راح يتقال
خليك قاعد جنب اخواتك
واسمع كام غنوة وموال
أ. صفاء
----------
سيبك من حقك وأمالك
ملناش حق مع الأوغاد
لم أخواتك ويا عيالك
فينا الفقر أهو جانا وساد
............
م. محمود
-------------
أرضنا راحت مع كرامتنا
يوم ما بقينا من الأتباع
ولا نقدر نرفع أصواتنا
لما الغالي رخص واتباع
أ. صفاء
----------
مين يسمعنا ومين ينصفنا
أو يجعلنا الند لناس
داسوا كرامتنا ونسوا همتنا
حتى الأرض فايتها الفاس
............
م. محمود
------------
غزة يوماتي بيضربوا فيها
والعالم كله بيتفرج
خلوا عاليها زي واطيها
واحنا كمان واقفين بنهرج
أ. صفاء
---------
رفح وغزة.. بادوهم واحنا
نهرب نجري مع الجرذان
لانصرناهم.. ولا مقدورنا
نرفع عنهم أي هوان
........
م. محمود
-------------
حد يقول لي ليه ساكتين
ليه كلنا مبنتحركش
ليه خايفين وبقالنا سنين
عايشين كده مبنتغيرش
أ. صفاء
----------
فين إسلامنا وفين قوتنا
فين عروبتنا مع الأهوال
نسكت ليه عن ظلم اخواتنا
ونسيب فيهم دم و سال
..........
محمود
---------
يعني هنفضل كده على طول
والأقصى بينادي علينا؟
والا هنصرخ بقى ونقول
هنحرر أرضنا بإيدينا؟
صفاء
--------
إمتى ح نصحى ونعمل حاجة
بيها نخوف كل جبان
يسمع لينا القاصي وداني
نبقى كرامة وليها ميزان
.........
محمود
----------
قوموا عشان منقولش خلاص
خلص المولد بقى واتفض
لما يكون عندنا إخلاص
ننقذ كرامتنا من الأرض
صفاء. ............
اصحوا وصلوا الفجر وقولوا
ربي يهد عدو جبان
لما النية ح تصفا .. نلاقي
نصر إلهي ولينا أهو حان
محمود. .............
يلا نقوم ننقذ كرامتنا
ونحرر أرضنا بأيدينا
لما نكون كلنا إيد واحدة
الأقصى يعود تاني إلينا
----------------------------
بقلم الشاعرين
أ. صفاء الخواجة
م/ محمود الحريري
ليست هناك تعليقات:
إرسال تعليق