🍁حوار🍁
الابن
يامه نسيت اللحم وطعمه
نفسي ف حتة ترد الروح
شمبري.ضاني أو عصعوصة
قلبي ياناس مليان بجروح
الأم
يابني بلاش اليأس واشكر
رب كريم وعطوف ورحيم
تلقى الفول فيه طعم السكر
ومتسمعش شيطان ورجيم
الابن
يامه كفاية تصبري فيا
نفسي أعيش ويا العاشقين
والقى حياتي جميلة وحلوة
مبقاش فيها مع الغايبين
الأم
يابني بلاش.. تتمرد دايما
تلعن عيشتك و العايشين
ده اللي يبص لغيره بتُحرم
عيشته ويصبح م. الكافرين
الابن
يامه أدعي لي ده غصبً عني
باشقى بمطلع شمسي لليلي
عرقي وتمنه ما بيكفيش
نومي بكسرة ضهري و حيلي
الأم
بكره العوض الحلو يجيلك
يسعد قلبك والسامعين
أصبر ربك بينا.. العالم
بس تكون له من الشاكرين
الابن
حاضر يامه اديني الصابر
آخرتي حفرة وليها ضامنين
ولا عنديش لأمالي ف بكره
أي ضمان ولاقلب يلين
🍁بقلمي/ صفاء الخواجة 🍁
ليست هناك تعليقات:
إرسال تعليق