" ساكتين ليه "
------------------
قفل يابني خلاص شطبنا
خلص المولد بقى واتفض
ولنهايتنا خلاص قربنا
ماهي كرامتنا بقت في الأرض
..........
قفل يابني ولم حاجاتك
ومعدش كلام راح يتقال
خليك قاعد جنب اخواتك
واسمع كام غنوة وموال
............
أرضنا راحت مع كرامتنا
يوم ما بقينا من الأتباع
ولا نقدر نرفع أصواتنا
لما الغالي رخص واتباع
............
غزة يوماتي بيضربوا فيها
والعالم كله بيتفرج
خلوا عاليها زي واطيها
واحنا كمان واقفين بنهرج
........
حد يقول لي ليه ساكتين
ليه كلنا مبنتحركش
ليه خايفين وبقالنا سنين
عايشين كده مبنتغيرش
..........
يعني هنفضل كده على طول
والأقصى بينادي علينا؟
والا هنصرخ بقى ونقول
هنحرر أرضنا بإيدينا؟
.........
قوموا عشان منقولش خلاص
خلص المولد بقى واتفض
لما يكون عندنا إخلاص
ننقذ كرامتنا من الأرض
----------------------------
بقلمي: م/ محمود الحريري

ليست هناك تعليقات:
إرسال تعليق