شيطان الشعر
شيطان الشعر بيزورني
ونا نايم ونا صاحي
لما ييجي ونا نايم
باسهر معاه صباحي
يواعدني يونسني
يوصفلي في جراحي
أوقات يلعب بعواطفي
ويطلع كلام يفرحني
وأوقات ألقاه يزعلني
ويطلع كلام بيجرحني
لكن أنا باختار
كل الكلام والمعنى
بحيث يخلي الضلمة نهار
وللفرح عنوان وله مغنى
وساعات ييجي آخر الليل
وساعات ييجي في نهار
يحكيلي عن الشقا والويل
ويبوح ليا كتير أسرار
وتيجي الفكرة واهجرها
وأعدل فيها في دماغي
وأقول لها أمشي واشطبها
وترجع تاني وتلاغي
وأشيل حرف وأحط حرف
لأجل يكون لها تفسير
وأشيل كلمة وأحط كلمة
لأجل يتحسن التعبير
وف الآخر أكتب الكلمة
وأكون تعبت من التفكير
وبيقولوا عني إني أنا شاعر
وباكتب كلام موزون
أتمنى يا رب يعجبكم
ومن قلبي لكم ممنون
تفتكروا إللي يقول الكلام ده
ممكن يتقال عليه شاعر
ولا أقول للشيطان يمشي
وكفاية تعذيب في مشاعر
وهبه البوهي
ليست هناك تعليقات:
إرسال تعليق