ذكــريـــات بـيــن أحـضـــان الـغــريـــب
بمناسبة عيد السويس القومى
قالولنا عدّوا القناة .. قمنا وعدينا
وقلنا الله أكبر .. والنصر كان لينا
قلوب ماليها الإيمان .. وأرواحنا بإيدينا
ودمانا ع الرمل سالت .. علشان خاطر سينا
***
ولما حاول العدو يدخل مدينتنا
أهالى بلدى السوايسة .. اتجمّعوا ف بيتنا
وحافظ سلامة الأصيل .. قام شدّ عزيمتنا
واقسم يمين بالله .. ما ندوقوا طعم النوم
حتى يشوف العدو .. الموت على إيدنا
***
ساعتها .. كانت الشهادة .. هيّ مطلبنا
أرواحنا كانت رخيصة .. والعزم فى قلوبنا
وعشان تراب أرض بلدى تبقى الشهادة وجبت
وربنا كان معانا .. بعيونه حارسنا
***
ولما عادت السويس بإيدين رجال أحرار
وعاد لمصر السلام .. والليل بقالو نهار
ودار علينا الزمان .. وجار علينا كبار
وبلدى السويس الحبيبة .. نسيوها ناس شطّار
أما اللى ضحى بحياته .. وصبح مع الأبرار
واللى بقى لسه عايش .. قاموا طلعوله قرار
بمعاش ومبلغ عظيم
يجيب كيلو لحمة
مايكفّى زوجه وولاد
ياكلوا عشا وفطار
****
رفعت محفوظ الاسكندرية
ليست هناك تعليقات:
إرسال تعليق