دويتو.💓يرضي مين💓
سجال بين م. محمود الحريري
و
أ. صفاء الخواجة..
💓💓💓💓💓💓💓
صفاء
راح يرضي مين يبقى الألم
هو النصيب هو القدر
للي تمللي..بيتظلم
ويا حبايبه .. والبشر
م. محمود
ويرضي مين يبقى الأنين
هو صوت المطحونين
ودموع تشوفها في كل عين
من عيون المظلومين
صفاء
ولا يرضي حد يكون أنينهم
شيء مباح
يكفى القلوب ..كتر الألم
ودموع جراح
م.محمود
ويرضي مين تبقى القساوة
في زماننا ماركة مسجلة
والعنف بيغطي الشوارع
والطيبة صبحت معضلة
صفاء
وده يرضي مين قسوة حبيب
تفضل بقلب معلمة
ينسى معاه معنى الأمل
جوه ليالي مضلمة
م.محمود
ويرضي مين لما الشوارع
يبقى فيها مشردين
صبيان بنات بدون أهالي
ويبقوا مشروع مجرمين
صفاء
طب يرضي مين قولوا ياناس
تحت الكباري ولاد...بنات
الأرض هي المرتبة هي اللحاف
فين الحنان؟ يكونش مات؟
م.محمود
أيوه الحنان مات من زمان
والرحمة ضاعت والأمان
ولاعاد مكان للطيبين
والحب غايب من سنين
قولولي بس دا يرضي مين
صفاء
مين يرضى ؟ مين يبقى الجحود
فى قلوب ولادنا المنكرة
لعذاب سنين. بنربوا. آه ونعلموا
وفى دار نكون بلا مرحمة
غاب الحنان. غاب الأمان
والصبر آخره... المقبرة ..
م.محمود
ويرضي مين.. لما الولاد
عايشين في خيرنا وعزنا
يوم مانلاقيهم يكبروا.. يتنمردوا
مايهمهم كل اللي راح من عمرنا
صفاء
مش عارفة ليه ...ويرضي مين
كل المشاكل والصعاب جوه الأسر
وليه نلاقي فى الخصام دايما بعاد
واللحم هان والدم هان وشجار فجر
م.محمود
ويرضي مين.. لما الغني
يعيش في عز ولبسه حرير
مش شايف غير نفسه وبس
ويرفض يتصدق لفقير
مع إن حياته وأفعاله
تلاقيها كلها تبذير
صفاء
و يرضي مين أكل الفقير
دايما رغيف ومعاه عرق
متغمسين بدموع شقاه
وإن نام بضحكة يكون سرق
عايش ف ضنك ومستحيل
ولا عمر عيده معاه فرق
م.محمود
ويرضي مين..
نلقى الدموع فى عيون يتيم
مش لاقي قلب عليه رحيم
ولاكلمة حلوة تفرحه
ولا حد يبقى معاه كريم
صفاء
ربي معاه. مسكين. يتيم
ف دنيا وحشة معفرة
فيها اللئام على كل لون
باعوا الجنان بالمصلحة
نسيوا الفقير ويا اليتيم
ناسيين آخرهم مقبرة
م.محمود
وده يرضي مين..
لما ناس بتنام من غير عشا
ولاحتى لاقية مكان دفا
وناس في عز ونغنغة
لا بيرحموا..
ولا يعرفوا معنى الوفا
صفاء
ولا يرضي حد .. يامجتمع
بكره الخسيس يندم كتير
لما الحياة تديه قلم
ويفوق يلاقي النغنغة
صبحت معاه.عسر وألم
فيها كتير م الانتقام ويا الندم
م. محمود
ويرضي مين ميكونش فيه أخلاق
خداع وغش وحرب في الأرزاق
والكذب والتدليس في كل مكان
والكل مسعور بيجري كأنه سباق
صفاء
ليه يرضوا بيه. قلب الفتاة
بيموت سنين
لو يغصبوها ع الجواز
من زوج ضنين
ليه يحرموها م الميراث
ليه يقتلوها بدون سماح
ويكون جزاءها ف وأدها
ومفيش حنين
أو ذكريات للأخت
أو حبة.. هَنا
م. محمود
عادات كتير.. منرضهاس
ولاترضي أبداً أي دين..
عادات غريبة...
ولسه عايشة من سنين..
زى الميراث والتار كمان
عادات عليها مصممين
بالله عليكم.. ترضي مين
صفاء
وهيرضي مين الأم ربت وإتنست
ومن ولادها ..بتترفض وبتتهجر
تكونشي يوم فيهم.. قست ؟؟
والا السفاهة والتفاهة. بتتعذر!
م.محمود
ده ربنا لما أمرنا نعبده
وَصَّىٰ على الوالدين ونوَحِّدُه
وفى القرآن.. ذكر الأم وتعبها
هي اللي بترَبِّي..
وإبنها ترعاه وتأَدِّبُه
ويرضي مين لما يبقي الإبن عاق
وضميره عمره ماأَنِّبُه
بكره ينول كل العقاب
وربنا هيعَذِّبُه
صفاء
ولا يرضى حد بابن عاق
وبوالديه دايما ف أف
ناسي عذاب ..ربه إليه
عنده ما ضايعة حتى هٌف
أوعى تقول.للوالدين
كلمة زعل لو حتى ظُرف
م.محمود
وده يرضي مين..لو المصالح
تبقى طاغية على المبادئ
لو الصداقة تبقى لعبة
وتتبني على فكر خاطئ
لو صديقك يخذلك
لما يحصل ظرف طارئ
ده يرضي مين؟
صفاء
قالوا زمان إن الصديق
هو المرايا الصادقة
هو إللي ف الضهر واقف
ف الليالي المظلمة
دلوقتي فين هو الصديق
إللي بيسرق والا ينهب
والا يقتل. صُحبته؟
قولوا ياناس.و ده يرضي مين؟
م. محمود
ويرضي مين...
لما نلقى الجهل عَشِّش في العقول
والمناصب.. يبقى فيها عجول
والمغمورين هما أصحاب المواهب
ويكون مصير الموهوبين مجهول
صفاء
عندك حق. ميرضاش حد
نمبر ون..و أوكا و بيكا
والا شاكوش. خايبين العقل
عيب الشوم يا أصحاب الويكا
فين الحق. يروح لاصحابه
عند طبيب ومهندس ذاكر
أو للعالم جوه.. معامل
والا مدرس جوه الفصل
واقف يشرح ويفصلها
دول يا اخوانا اصحاب الفضل
فين رايحين ياصحاب الخبرة
ردوا أنا عقلي خلاص إتشل
م.محمود
ويرضي مين؟
لما القوي بيتعمل له حساب
والضعيف يندفن تحت التراب
والكل بيجامل القوي ويتقرب له
أما الضعيف ماتلاقيلُه صحاب
صفاء
آه بيرضيهم.. ويفرحهم
إللي مافيهم ريحة النخوة
لما يلاقوا ضعيف. يهينوه
مافي شهامة وفيها الرخوة
يبقى عليه الفُرجة وضحكة
يمشي مابينهم ذل وشقوة
ولا يلقاش جواهم رحمة
م.محمود
ويرضي مين..
لو كمان مات الضمير
والدنيا تصبح غابة
والوضع يبقى خطير
والجرايم والمصايب
كل يوم بتزيد
تكتر جيوش الشر
والدنيا يقل فيها الخير
صفاء
من ده إللي قسم ف الحقوق
وبكل ظلم.. ومنظرة
بيسوق فى ناسه بعنطزة
والقهر هو الفنطزة
و ده يرضي مين؟؟
م.محمود
دا كل ظالم له نهاية مؤلمة
والنهاية بتبقى دايماً ملحمة
والظلم عمره مايرضي ربنا
يرفع إليه كل مظلوم مظلمة
والظلم لو طَوِّل سنين
هتعود حقوق المظلومين
هوا الظلم أصلاً يرضي مين؟
صفاء
الدنيا ليه... فيها العجب
فين إللي باع. مين اشترى ؟
وباعوها ليه..بالمهزلة
والسفك ليه رُمح.. وشرى !
عندي كتير.. م الاسئلة
ح تأخروا .. للآخرة. ؟
والا ..لوقفة .....ربنا؟؟
سبحانه عنده الفاصلة
يحكم مابينا كلنا ..
وبالمقدرة
عدله.. ح ياخد حقنا
ويوميها. نرضى كلنا
م.محمود
دنيا.. وفيها العجايب
فيها اللي بايع واللي شاري
واللي مغلوب واللي غالب
فيها اللي مظلوم واللي ظالم
واللي جايب معاه مصايب
فيها اللي بيصون العهود
واللى بيخون الحبايب
واللي بيراعي الفقير
واللي بيعبي في زكايب
صفاء
ومهما كان.. فيها العجب
يبقى السؤال فين الفرح ؟
وليه نضايق..بعضنا
خسران يامين. ومين ربح؟
صاين عهودك. راح تفوز!!
وجزاء عسير للي.. جرح
ونهاية واحدة..مفصلة
للي خسر والجنة بيت للي ربح
م.محمود
الدنيا فيها من كل لون
فيها اللي ماشي واللي راكب
فيها اللي عارف ربنا
وقبل مابيغلط يحاسب
واللي ناسي يوم الحساب
وطول حياته ضميره غايب
ونقول لروحنا ده يرضي مين
ربنا يزيح المتاعب
💓💓💓💓💓💓
بقلم/ صفاء الخواجة
م/ محمود الحريري
ليست هناك تعليقات:
إرسال تعليق