🌹ح ارسم 🌹
قالت ح ارسم دنيا جديدة
فيها عزيمة .طريقها جديد
فيها العمر بكل أيامه
زرعة أرض خضارها جديد
أرض ف بلدي الحلوة السمرة
خيرها عشانا يفيد و يزيد
***
قلت
ارسمي بيت مليان بالحب
أب وأم وخال مع جد
كل قلوبهم مفيهاش حقد
يقدروا دايما يبنوا بجد
يطلع ليهم جيل بينادي
حلوة بلادي ياأم المجد
***
متخليش العمر يسرسب
من بين ايدي وايد الكل
مهما نقابل ف صعاب عافري
تلقي صباحك زي الفل
نيلنا بيجري سنابل حب
ضحكة جميلة في عين الطفل
***
قالت ح امحي آلام الذكرى
جوه القلب المحتاج جبر
واللي اتمنى يكون له حبيب
جوه طريقه بيزرع صبر
قلت فى بكره ح تلقي سنينك
مفيهاش دمع. ح تلقي البر
***
سيبك م المجهول واتمني
دنيا جديدة مافيها دمار
فيها اليوم ولوحده بيرسم
نسمة جميلة مافيها غبار
ربك قادر ورحيم دايما
بيزيل هم .. كبير جبار
***
🌹بقلمي/ صفاء الخواجة 🌹
ليست هناك تعليقات:
إرسال تعليق