أمل مفقود
ـــــــــــــــــــــ
لِمّىِ اللي فاضل بقى
لِمّي التراب بالدّمْ
لِمّي بعَرَق الشّقَا
داري الدموع فى الهم
لِمّي اللّي مَات ع الحجر
لمي
الحصاد م الريح
حتى الفروع ع الشجر
متدلدلين مجاريح
دم الأمل مسفوح
فوقه دموع الورد
مسكين منين ما يروح
مدهوس وما له حد
مشنوق يا فرح الغلابة
الطمعانين فى الصبر
فى القهر دايبين صبابة
ماشيين طابور للقبر
يا دنيا يا ملطّمه
في ابن الفقير م المهد
عدينا 100ملطَمَة
ولا يوم سمعنا حد
لا القهر هز الأمل
ولا حرك الأحاسيس
امتى الجراح تندمل
امتى يتوب ابليس
اهل الطريق روحوا
والموت هنا سهران
ما يسيبش يوم مطرحه
ما يباتش يوم عطشان
لموا البنات، لملموا
ستر البنات مطلوب
فوق الطريق حملوا
جنب الصبايا قلوب
يا قلوب ملاها العفن
قطفوا الورود م العود
زَفوُا البنات فى الكفن
بس الفساد موجود
كلمات
عبد الرحيم على
ليست هناك تعليقات:
إرسال تعليق