🌴لسه بدري🌴
بدري جدا ع القلوب
اللي سايقة ف الصدود
لما يبقى .. هواها جنة
شاطرة تهدم ف السدود
***
لسه بدري عليك ياغالي
ياللي ماشي طريق طويل
ضلمة خالص والحدادي..
فيه بتخطف للعويل
***
وأنت غالية بس حالك
مش ح يرضي بن الأصول
فاهمة إن العريُ .. عادي
منهجك منهج عجول
***
دنيا فيها واحنا. ضعنا
بين عاداتنا ودين يقول
إن لينا شرع ..سايد
تقتنع بيه العقول
***
لسه بدري عليك يا راجل
جوه بيته مالوش لزوم
راعي تارك .. الرعية
تايهة . غرقانة ف سموم
***
يلا اصحى وفوق وأسأل
ابن . بنت . ف حال يطول
احنا شعب كبير . جدوده
نصرهم كان ع المغول
***
ليه نسلم .ليه ح نيأس
لسه بدري فوق وقوم
جوه بحر النصر دادي
علو موجه يلا عوم
***
سيب وراك كسلان ينادي
لسه بدري تعالى نام
قوله بدري ع اللي زيك
واللي زيي فجره قام
***
ح انبش الصخر بضوافري
يرجع المجد اللي فات
وإن فشلت ابني بعدي
يغزل الشال من سكات
***
لاجل مصر تبقى تاني
أمة ما بتعرف ركود
لاحقة دايما بالحضارة
أو نموت ونكون رقود
***
🌴بقلمي/ صفاء الخواجة 🌴
ليست هناك تعليقات:
إرسال تعليق