وصاياعلى الربابة
،،،،،،،،،،،،،،،
يا ولدي خليك رجيل
واوعى شيطانك يغرك
لا تماشي يابني دلاديل
لا افعالهم ياولدي تسرك
،،،،،،،،،،
وخلي بالك من النساوين
ولا رفع الحواجب يشدك تتوه متعرف على وين
والجري وراهم يهدك
،،،،،،،،،،،،
اعقل كلامي وراويه
الهلس سيبه لحاله
ف طريقك الخير ارويه
بكره تجني جماله
،،،،،،،،،،
اوعاك تهت في امك
عشانها ربك مراضيك
ليها قلب دايما يضمك
تنزل دموعها ف مراضيك
،،،،،،،،،،،
وطي صوتك لابوك
لازم ف مرضه تشيله
لبكره ولادك يسيبوك
واللي زرعته تشيله
،،،،،،،،،،،،،،،،
بنت الاصيل خدها تزينك
تصون بيتك ومالك
والخسيس بنته تشينك
وتسيبك دايما لحالك
،،،،،،،،،،،،،
خلي كلامك كما السيف
ف الحق يقطع ويبتر
وخلي كفك دايما نضيف
حلاله ولو قل يستر
،،،،،،،،،،،،،،،،،
ف المجلس اقعدولاتبيع
واشتري خبرة كبيرك
لو بايع في يوم هتضيع
وسرك ارميه ف بيرك
،،،،،،،،،،،،،،،
شارك مراتك همومك
وشاور وخالف وراضي
وانشر ف النور هدومك
وخليك ف الحق قاضي
»»»»»»»
اوعى من حقك تفوت
ولاشبر من ارضك تسيب
وعن عرضك دافع وموت
ولا للندل تبقى حبيب
،،،،،،،،،،،،،،،،
ادي لاختك ميراثها
زي ما قال الكتاب
عشان تدعي لك براسها
تنجى يوم الحساب
،،،،،،،،،،،،،،،
بالادب علم عيالك
وعلمهم اصول دينك
دعوتهم تبقى
باقيالك
ومعاهم تسعدسنينك
»»»»»»»»»»»»»
محمودعمارالزلباني
ليست هناك تعليقات:
إرسال تعليق