بطلت اسأل عنك يمكن
أأقدر مره في يوم انساكي
يا خسارة مطلعتش بنسى
وفاكر كل دقيقة معاكي
فاكر مسكة ايدك ليا
عارف كنت انا ايه جواكي
فاكر لما مشيتي ساعتها
قلبي اتخلى فارقني وراكي
وازاي هقدر انسى وعادي
كل ده عني يروح بالساهل
لو فينا واحد راح ينسى
يبقى مكانش صحيح يستاهل
كل علاقة بيكون فيها
حد أصيل حد بيتساهل
مش قادر اتخيل إني
كنت الطيب كنت الجاهل
معقول هنسى سنين كات بينا
معقول هنسى حاجات عشناها
ده يدوب صورتك لو بلمحها
بترجعني سنين وياها
لمواقف حلوة يا جمعتنا
وذكرى ياما سهرت معاها
وازاي هقدر اقول انا بنسى
وانا فى الأصل عايش جواها
وازاي هقبل اعيش مع غيرك
وازاي هتكملي مع غيري
كل ما افكر فى انك روحتي
بختل وتنقص مقاديري
بقى بالساهل نبقى لغيرنا
مش قادر استرضي ضميري
يرضي مين بعد اما راعيتك
واحد تاني هيحصد خيري
لو على البعد مسيرنا نقرب
لو على القرب مسيرنا نواصل
ياما زمان عدينا وفوتنا
ياما زمان خطينا مشاكل
مش دي عوايدك لما بنزعل
تسيبيني لوحدي بتساءل
كنا تملي لما بنزعل
انتي اللي تهدي المسائل
قلبي مصمم يفضل فاكر
قلبي مصمم انه يحبك
قلبي بيعجز عن هجرانك
لا هو قد الهجران ولا قدك
ياللي فرشتي الدنيا قصادي
مين يقدر يسعدني في بعدك
أنا لو كل الدنيا فى
ايدي
أنساها ولا اتوه عن حب
أنا لو ملك الدنيا ركعلي
أغفل عنه ولا اغفل عنك
#شريف_العمدة
ليست هناك تعليقات:
إرسال تعليق