البيت الجديد
هو ده يابني البيت الجديد
أبو باب كبير مليان حديد
عليه واحد شبه السجان
وشبابيكه مليانه ترابيس
ياااه
هو أنا هنت عليك
طب قولي عملت إيه
جزائي إن ضيعت عمري
عليك
وكنت من النسمة بخاف
عليك
ولو غبت شوي روحي
تشتهيك
وطول ليلي رايحة جايه
عليك
أغطي وأطبطب وادعي
ربي يحميك
جبت الأسية منين
ومين علي قلبي أساك
كنت بتمني رضاك
كنت إبني ورجلي ودنيتي
وحياتي كلها ليك
حرام يابني عليك
تحرمني من أول بيت
شاف أجمل سنيني
وعمري فيه فنيت
بلاش تحكم علي أموت
وقلبي وربي غضبان عليك
رجعني لبيتي القديم
الل كبرت فيه
وشاف عمري وصباي
وكل حاجة حلوة فيه
طب اقولك شئ
هسمع يابني الكلام
ومع العيال هنام
هرضى بفتات الطعام
والقليل من الكلام
ومش عايزه دوا
ولا إهتمام
خليني بينكم أنام
وأحس معاكم بالأمان
دى كلها أيام
واقابل رب كريم
وخد يا بني سريري
وكمان ال كام جنيه
تعويشة العمر
ال فيتاهم ليوم الممات
ومعاهم هدمتين
كنت شيلاهم للعيد
خدهم اعملهم مداس
ولا امسح بهم بوتاجاز
المهم سبني بينكم انام
لما يأذن رب الأنام
وروحي ليه تفيض
وبرضوا ليه ما هشتكيك
ما انت قلبي ودنيتي
ومن الهوا بخاف عليك
رجعني لبيتي القديم
مش عايزة عنه اغيب
ولا عايزة البيت الجديد
رسالة من ام مقهورة
ظلمها إبنها والزمان
هوى الإمام
ليست هناك تعليقات:
إرسال تعليق