سجال دويتو بين الشاعر/ أ. يوسف أبو زينة
والشاعرة أ/ صفاء الخواجة
🌷 قول ياقلم🌷
الشاعره /صفاء الخواجه
قول يا قلم واحكي الكتير
عن ناس كتير..متعذبين
تايهين مابين لحظة ميلاد
ولحظة فيها. مكفنين
الشاعر / يوسف أبو زينة
قول ياقلم على المقهور
اللي مش لاقي لقمه جعان
واللي متبغدد ف القصور
نايم على ريش شبعان
الشاعرة / صفاء الخواجة
قول يا قلم على أم عانت وإتفنت
شبوا الولاد ناسيين لكل فضلها
وعن حياتهم يبعدوها وإنتهت
وبدار و فيها سلموها بحزنها
الشاعر / يوسف أبو زينة
قول ياقلم على ظلم الأبناء
اللي كلوا خيري وصحتي
ولما مرضت مش لاقي دواء
رَموني ف الشارع عشان شقتي
الشاعرة / صفاء الخواجة
قول يا قلم وقول كمان
عن بنت حلوة صغيرة
غصبوها تقبل بالعريس
عاشت حياة. متدمرة
الشاعر/ يوسف أبو زينة
قول ياقلم على الخيتان
اللي مخالف شرع الله
قول واكتب على الحيطان
سيبوا البنت تعيش الحياه
الشاعرة / صفاء الخواجة
وقول كمان من غير كسوف
عن الفساد جوه النفوس
وازاي نغير..نفسنا وبنفسنا
وازاي يكون الخير فانوس
الشاعر / يوسف أبو زينة
قول ياقلم على الطلاق
اللي بقى اتنين ف ثانيه
اية أسبابه هل الغلاء ..؟
ولا كتر العيال ف الدنيا
الشاعرة / صفاء الخواجة
قول يا قلم وإحكي الألم
ليه الطلاق خلف عيال
تحت الكباري. وفى الشوارع
متعرضين لكل انواع الإحتيال
وليه ياناس هما اللي دايما يدفعوا
تمن الفراق. ويضيع أمان ويبقى حال
الشاعر / يوسف أبو زينة
قول ياقلم على المخدرات
اللي إنتشرت زي النار
مابين الشباب ف الحارات
اللي خلت عقلهم طار
إشتروا الوهم وهو الألم
إكتب روشته للإنحدار
الشاعره / صفاء الخواجة
هي بس مخدرات. فيه كتير
إرهاب وقتل..و بلطجة
قول ياقلم..عن التحرش وإغتصاب
مش هي دي أم الحضارة الملحمة
الشاعر / يوسف أبو زينة
قول ياقلم ع اللي بيهرب
من حياته إلى الجحيم
رِكب الأمل جوة المَركب
غرق ماشافش النعيم
الشاعرة / صفاء الخواجة
وقول كمان. ع اللي بيحمينا الجدع
واقف بصدره للرصاص لأجل البلد
والفخر شامة فوق جبينه بعزها
إزاي تموت وبغدر يا أجمل م اتولد
الشاعر / يوسف أبو زينة
قول ياقلم ع الإغتصاب
وعلى التحرش بالبنات
وع اللي بيسرق ونصاب
وعامل إرهاب للحرمات
الشاعرة/ صفاء الخواجة
قول يا قلم ح نقول معاك
إيه إللي غير ف الحياة
بدلها من جنة..لنار
والفرجة صبحت ع الحفاه
فين المعلم والطبيب والمدرسة
فين ..الدعاه؟؟؟
أ. يوسف أبو زينة
أ صفاء الخواجة
ليست هناك تعليقات:
إرسال تعليق