ألفين ندامه عليك جدع
بتيجي دايماً ع الوجع
كنت فاكرها ظروف
رَجَّعت خلاص المُرتجع
وقفلت باب المنتجع
ظني راح يتبدل ل خوف
كل حته مِعلِّمه
كل م أطلع سِلِّمه
باحس بحاجه مؤلمه
والضرب كله ع النفوخ
كام مره الواحد اتلدع
كل م أقول عليه جدع
بلاقى القرص ع الوجع
ومحدش عاوز يحوش
حتى ف عز المرض
الكل سابنى واعترض
بعد م خد مني الغرض
بقيت ف غابه م الوحوش
تملى بابلع ف الزلط
الأمر أصبح مختلط
مش عارف الصح م الغلط
مصلحته،،،والباقى ميلزموش
ليه بتقولوا عليه وباء
ميمكن ده يبقى ابتلاء
من عند ربك إللي شاء
وبأمر منه يختفي
بس إحنا نخرج م الضلال
وناكل اللقمه بحلال
ونصوم مع أول هلال
قبل م النور ينطفي
فى ناس عايشه ف شقا
وناس بتتمنى اللُقا
كفايه م الظلم بقي
هو انتو إيه،،،مبترحموش؟؟؟
،،،،إيهاب السقا،،،،
ليست هناك تعليقات:
إرسال تعليق