أغنيات على الشط
----
على شط الهانوفيل
خدنى الشوق لهناك
وهناك شفت حوريه
بتبلبط فى الميه
وتقول أنا رشيدية
فى العوم باتحداك
****
مين قدى مين قدى
وسط الموج أنا أعدى
ضربة ايد مع رجلى
زى صاروخ فتاك
****
قلتلها شـرفتى
وفى شـطى نورتـى
قالتلى قوم انزل
ليه كـلام وياك
****
قالتلى شوف قـدى
تحت الموجه يعدى
قلتلها طـب هدى
عند الصخره هناك
***
وقعدنا نتسابق
والموجه أخدتنا
ترفعنا بحنيه
وبحـب تـهدهدنا
وصوت م الميه يقوللى
حـلوه الدنيا معاك
***
وقعدنا ع الصخره
مع نسمة عصريه
والنسمه تـوشوشـنا
بكلمة حـب شقيه
نتكلم بالهمسه
والعين ويـا اللمسه
لـحد الشمس ما غابت
واحنا لسه هناك
***
ونزلنا فى الميه
والموجه تلعب بـينا
قرب الشط سابتنى
بأكمل غناوينا
والبنت الرشيدية
تركتنى فـى الميه
وقالتلى يا روح قلبى
بكره أنا ح استنـاك
رفعت محفوظ-اسكندريه
ليست هناك تعليقات:
إرسال تعليق