قصيدة " يادنيا ليه بتعاندينا"
------------------------------------
يادنيا ليه بتعاندينا
وكل يوم تقسى علينا
وليه بتسرقي فرحتنا
د احنا اللي فينا مكفينا
الحزن عشش في قلوبنا
ومن دموعنا بيسقينا
والغش بقى مالي حياتنا
والغل.. يكتر حوالينا
يادنيا ليه بتعاندينا
وكل يوم تقسى علينا
.............
أحبابنا سافروا ونسيونا
وسابولنا أحزان تشقينا
أصحابنا برخيص يبيعونا
ولاحد فيهم يواسينا
قدامنا يضحكوا في وشوشنا
فى الضهر نارهم تكوينا
و يفرحوا لما بنغرق
و يزعلوا.. لو قبينا
َمن أقرب الناس لقلوبنا
الطعنة صعبة وتئذينا
يادنيا ليه بتعاندينا
وكل يوم تقسى علينا
.............
عمالة بتزيدي جراحنا
وبقينا ناسيين أسامينا
وبقسوة حطمتي أمالنا
وفى الضياع ليه ترمينا
تسيبينا فِ البحر حيارى
ع البر ليه ماترسينا
يادنيا ليه بتعاندينا
وكل يوم تقسى علينا
نفسى يادنيا ف يوم نفرح
يادنيا إمتى تصالحينا
--------------------------------
بقلم : م/محمود الحريرى
ليست هناك تعليقات:
إرسال تعليق