(رمضان كريم)
شعبان وقبله رجب
عدى علينا وفات
بيقول يا أهل العرب
أنا جاي بالنفحات
ويقول يا أهل الطرب
متسمعوني سكات
هنوقف اللى انكتب
وهنسمع الآيات
**************
أنا جاي أبشركم
رمضان خلاص أهو آت
وبإيدي أعطركم
بأجمل الابيات
واخترت أشطركم
علشان يقول كلمات
من غير ما أحيركم
ده مصطفى الشحات
**************
شهر الكرم والجود
والرحمة والإحسان
الفضل فيه موجود
واضح فى كل مكان
والخير مالوهش حدود
ولايبقى فيه حرمان
والمغفرة بتسود
والعتق مالنيران
**************
بيهل بهلاله
الكون بيبقى مريح
ياسلام هنياله
من صلى فيه التراويح
وفيه اللى يحلاله
يسمع كمان تواشيح
والكل يسعاله
ويسبق عشانه الريح
**************
أيامه معدودة
دايما بتجري قوام
وليالي محمودة
بذكر وصلاة وقيام
فيه ليلة موعودة
آخر عشر تيام
والرحمة موجودة
بس انت اوعى تنام
****************
القلب عاد لَين
برغم انه حديد
والذنب كان هين
دلوقتى راح لبعيد
والكل هايبين
قلبه بشكل جديد
وأخلاقنا تتزين
لتلات ليالى العيد
***************
يارب اوعدنا
بلغنا نفحاته
يارب خد إيدنا
نولنا بركاته
نور لنا بيتنا
بذكره وآياته
واجعل لنا عيدنا
رحمة بكرماته
***************
كل عام وانتم بخير
اللهم بلغنا رمضان
مصطفى الشحات
ليست هناك تعليقات:
إرسال تعليق