يسعد مساك يا قمر
يسعد مساك
من كتر سهدى يا قمر
باسهر معاك
أنا قلبى عاشق يا قمر
عصفور جميل
يشبه فى حسنه يا قمر
منظر بهاك
…..
قاعد فى ضل الشجر
ومعايا كام موال
وناى حزين بين صوابعى
قال اللى ما ينقال
صحت الطيور ع الشجر
نزلوا وقالولى
كفايه لحنك شجانا
سهرتنا وياك
….
قلت الحكايه طويله
عصفور مدوخنى
طرت معاه فى السما
وبقربه فرحنى
وجه لحـد شواطئى
ع الرمله واعدنى
خان الوعود ياقمر
وببعده سهرنى
فرق ما بينا البعاد
وطار بعيد فى سماك
….
قالت الطيور يا حزين
اوصف لنا شكله
ومنين نلاقى طريقه
وفين مكان أهله
يمكن لأجل خاطرنا
يعود اليك تانى
وبعد طول الغياب
تلقى الحبيب وياك
….
أنا قلت طيرى جميل
وحسنه ما وصفشى
من حسنه غار الجميع
وطبعه ما تقولشى
والسحر جوه عيونه
يجذب ما يبعدشى
والرمش فوقهم سهام
بتصيب ما تجرحشى
أما مكانه يا طير
بجوار جبل عالى
يطل على بحر أحمر
وموجه مش عالى
وتحت موجه جناين
مرجان من الغالى
وبيته وسط الصفا
على بابه ياسمينه
عطر زهورها الجميله
يدخل من الشباك
….
قالولى طيرك يا ولدى
صعب المنال بعيد
دور على حد تانى
أو روح لسيدى غريب
يمكن ببركة مقامه
تلقى الوصال قريب
وارجع لربك وادعى
تلقى الرضا جواك
…..
شعر :رفعت محفوظ – الاسكندريه
ليست هناك تعليقات:
إرسال تعليق