سجال 🌹 الإخوة 🌹
بين الشاعرة/صفاء الخواجة
والشاعر / فضل عبدالرحمن
🌹🌹
صفاء..
ابن أمي الغالي أخويا
يوم ميلاده.كان لي عيد
جوه عينه شوفت روحي
شوفته شمع جميل يقيد
فضل..
اختي الغالية ونور العين
حب كبير من غير تحديد
زهرة عمري زي السكر
فراشة بتضحك يوم العيد
صفاء
وأنت يا أخويا سندي وعوني
جوه القلب ..مكانك غالي
صورتك دايما..جوه عيوني
حبك ودك.. ده مقام عالي
فضل
فضل - 2
يلا يا عمر اخوكي بسرعه
نجري ونلعب تحت الشجرة
نروي الأرض بامل الفرحه
يا غالية اخوكي مسافر بكره
صفاء
تحت الشجرة نغني ونلعب
مع أصحابنا بنات وولاد
هما الجيرة وكل الفرحة
أختي سعاد وأخوها إياد
فضل
شايفه نهر النيل وجماله
وحلاوة شجره وغيطانه
ولا صوت الساقية تغني
عن اصله وتغني تاريخه
صفاء
نيللنا شرابه الشهد مكرر
ميته تجري بدمي ودمك
يروي أراضي.لخيرها بنجني
يفرح خالي.. وكمان عمك
فضل
مصر الأرض وانتي الفرض
وحفاظي عليكم عهد وفرض
وسحر جمال الروح يشقيني
ومصر طول عمرها ترويني
صفاء
مصر هي أمي.. فيها
الكرامة تزين واديها
وإللي ييجي عليها يلقى
نار ولادها تبيد عاديها
فضل
ما تخافيش يا بت ابويا
انا مصري ودمي حامي
اللي يفكر يدوس ترابك
امسح اسمه من الوجود
صفاء
عارفة والله يابن أبوي
ده أنت بالدم تزود
عن صحابك .عن جيرانك
حامي دايما..للحدود
فضل
اللي يبص يوم لعرضي
ده انا كنت اقطع قلبيه
واشرب الدم اللي يجري
جوه شراينه في وريده
واخلى باقي دمه يجري
علشان يعرف اني سيده
صفاء
ملو عيني ليلي..نايمة
ليا اخ يحمي ..عرضي
يسألوه عن إيه بتفدي
رد قال أختي و أرضي
فضل
يلا اختي علشان مسافر
نرجع البيت اجهز حجاتي
ما تعطليش يااختي المواعد
روحي مشتاقه لروح زمايلي
صفاء
بكره رايح.. للميدان؟؟
يابن أبويا مفيش محال
ويا زاميلك أبقى أتدرب
مينا وأحمد وابن الخال
فضل
خلى امك تعمل فطير
وتدبح كام بطة وطير
مشتاق اروح لزمايلي
واجمع معاهم في الطابور
صفاء
ايوا حالا ....نعملوه
الفطير ..و ده م العيون
ويا بحة ..جنب فرخة
والمرحرح.. والزتون
فضل
وان رجعت تاني ياختي
راح اجيب لك منها ورده
واكتب اسم مصر عليها
ودمي ليها والله ما يكفي
صفاء
ح أدعي ترجع بالسلامة
ربي يكفيك ..الخيانة
وإللي إيدهم .. بتحاربنا
واللي أخيب.م الخيابة
فضل
راح ارجع عشانك يا غالية
علشان لما يجي عريسك
واقعد جنب ابويا وعمي
واتشرط واقول اختى غالية
صفاء
يحميك ربي يانور العين
وتعيش لما تشوف أولادك
أحلى مناصب جوه بلادك
يشرحوا قلبك ويا أحفادك
فضل
وان يوم ايد الغدر طالتني
وجالك خبيري اني شهيد
قولي لأمي اياكي تبكي
وزغردي ده انتي ام شهيد
صفاء
يبعد كل ...الشر عنك
يابن أبويا وقلب أمك
الشهادة شيء يشرف
يحرسك يانبض أختك
فضل
مصر يا غالية حب القلب
واجب وطني لازم نحميها
من الأرهاب او فكر دخيل
يا اختي ونحفظ اراضيها
صفاء
مهما قالوا ومهما عادوا
برضه أم الدنيا مصر
صانها ربي .. وفى امانها
راح نعيشها ف كل عصر
فضل
شوفتي اخوكي بلبس الجيش
لابس البدلة كأنه عريس
حالف باسم الله احميها
وغير نصر الله ما رضيش
صفاء
لايق والله عليك اللبس
كله ألاجة وشيك مايلقش
إلا عليك ياحبيب والديك
ياللي بحبك مافي الغش
فضل
يلا يا اختي خلاص انا ماشي
علشان الحق قطر اتناشر
سلميلي على الأصحاب
وانا را ارجع للأحباب
صفاء
طريق السلامة وخطوة نجاة
وكَرة لا فرة بوجه الضلال
سلامك ح يوصل لكل الصحاب
وترجع إلينا في عيد له هلال
تلاقي الحبايب كتير ف انتظارك
وأختك حبيبتك تزغرد.دلال
فضل
انا مش قلت لك هرجع تاني
كمان وعد الحر ده دين عليه
اختي الغالية افرحي باخوكي
روحنا وجبنا الديب من ديله
علمنا الخونه ان احنا الاقوى
وكمان حطينا الحديد في اديه
صفاء
♥️وختام♥️
يامفرقين .. إخوات
يامشتتين ..عيلة
أجمل شعور بالكون
إخوة ..وضليلة
يفضل وتد..بالبيت
مايغيبش.ولا ليلة
ده الحب زرعة خير
مطرة بلا غيمة
فضل
رب العباد قال لنا
دم العباد ده حرام
وقال كمان للبشر
ليه تقتل الانسان
فكر بعقلك يوم
في شريعة الاسلام
ده سلام لكل البشر
ياغافل فوق م الاوهام
بقلم أ/ صفاء الخواجة
الشاعر أ/ فضل عبدالرحمن
ليست هناك تعليقات:
إرسال تعليق