قول يا قلم
__________
قول يا قلم
صحّى اللى جواك م الألم
ومن العذاب
إيّاك تقول العدل غاب
أو يوم كلامك يتكتم
أو يوم تفوّت للى سابك للعدم
انطق وقول
أصرخ بصوتك ..هزّهم
إيّاك يهزك ظلمهم
واجعل حروفك دبابات
ما تدوقش يوم طعم السُكات
خلى الحروف تنطق وتتكلم لغات
يتفجّر الحرف اللى نشفت دمعته
إيه سَكّتُه
خلّيه ينور سِكّتُه
بنور اليقين
عرّفهم القلم اللى صابر آخره فين
خلى الحروف زى الكواكب فى السما
عرّف انين الصمت إيه طعم العمىَ
وارسم خريطة سكتك
قوم سمّع الدنيا الحروف على أصلها
وقّف طواغيت الكلام على رجلها
قول اللى جِوّاك ..طلّعه
خلى الخلايق تسمعه
خلى اللى نايم ع الودان
يتهز من صوت الأدان
خلى النهار يفرد قلوعه ع الغيطان
هات الطيور تصدح وتشهد ع اللى كان
قول يا قلم فضفض ولا تخبيش
قول يا قلم خلى الغلابة تعيش
حرّك حيطان الصمت..هز كيانها
واخبط جناب الدنيا ..دُق بيبانها
ما تقفش مبرى من العذاب بدموعك
خلى الأمور فى الدنيا كلها طوعك
قول كل حاجة وعَلّى صوتك ،عَلّى
واكنس غبار القهر أوعى تخلى
يا قلم بيحبى ولسه صوته فى عِبّه
اوعى اللى عابك يوم فى يوم ما تٌسِبّه
خليك قرارى وقول بكل جسارة
وان جار زمانك جور واعمل غارة
سمعنى حَىّ على الصلاة
من فوق... من اعلى مإذنة
يسمعها لاخرس يبقى افصح
منى أنا
كلمات
عبد الرحيم على
ليست هناك تعليقات:
إرسال تعليق