للخميس أحلى موال يتقال
(لا معنى للحياة مع اليأس)
-------------
لما تضيق ؟؟؟ وسعها
وان عصلجت دلعها!!!
والعين إللي فيها إخلعها
وبالخساره ياااااله بيعها
(لا معنى للحياة مع اليأس)
*
وان وقعت يوووووم قوم
وان غفلت إصحى م النوم
وان كسلت ضد التيار عوم
وما تحسس نفسك إنك مظلوم
بكره العز يرجع تاااااني ويدوم
وتنسى قلق الأمس
(لا معنى للحياة مع اليأس)
*
وإن قست عليك الأيام
طلع لها لسانك
واوعاك تتنازل عن الأحلام
وأحفر فى الصخر بسناانك
وما تعدش بقيلك كام
خد حقك من زمااانك
وكله بيرووح الحمام
أللحمة والعدس
(لا معنى للحياة مع اليأس)
*
وخد فاالك من عيالك ودوس
وإوعى تقول طظ فى الفلوس
وتبت فى العيش والنعمة وبوس
ومفيش حد فى الدنيا منحوس
ومحدش بياااكل بدون غموس
وحدد طريق لك مخصووووص
وإن جاااتلك لحظة فرح
مفيش مانع إنزل رقص
(لا معني للحياة مع اليأس)
*
إسمع نصايح مجرب
لكل شيء بالدنيااا جرب
وفي الشقااا تعب وقرب
ولف الدنيا سووبعه وإتغرب
وياما ياااما إتعور وإتكهرب
حتى فى الحروب ما إتهرب
إعمل كل شيء
جرب كل شيء
ماااااااعدا الهجص والهلس
(لا معنى للحياة
مع اليأس)
------------
الخال عصمت البيلي
ليست هناك تعليقات:
إرسال تعليق