....*( بلدي )*....
يام السمار فوق الجبين
والشمس طارحه ف أرضها
والفجر داب وقت الصباح
والنخل مال من حسنها
والزرع قام صحا الزهور
والعطر يفوح من حضنها
وانت يامصر يام التاريخ
عروسة محدش قدها
************
ياللي شمسك من زمان
فارده كل خير علينا
ياللي اسمك نغمة وغنوة
يام التاريخ وضي عنينا
نفدي أرضك نحمي عرضك
بكل شيء غالي ف ايدينا
ياللي حبك أصله نعمة
ساقها ربي يامصر لينا
************
تعالوا شوفوا معايا نيلها
من زمان راعي الحضارة
من زمان شريان قلوبنا
خيره مش محتاج أمارة
واما يوم نادت علينا
كله لبى بالأشارة
لجل مصر تبقى دايما
فى العلوم والدين منارة
************
وادي جنودها رجال الثورة
عين سهرانة وراية عاليه
حلفوا ألف يمين بالله
تعيشي يامصر دايما حرة
وقفوا ف وش الظلم بعزم
كتبوا تاريخ نقشوه بالدم
يحيا رجال الثورة
ف عيدهم
اللي صنعوا المجد بايدهم
************
بقلمي/اسماعيل عبدالهادي ابوالعلا
ليست هناك تعليقات:
إرسال تعليق