الى من يهمه الامر
************
سرقت قلمي وكسبت بيه
وقبل منه رفضوك يا بيه
وريني تاني راح تعمل ايه
نفسي اشوفك اديب كبير
حافظ كلامي مهما تبدل
وليه لروحه بسرعة تقتل
أنا عندي منه كتير واكتر
ياريت ح تقدر عليه تسير
مع أن فعلك والله جارح
أنا طول حياتي دايما مسامح
واللي وهبني فى شغلي فالح
دايما معايا بكلام منير
أنا كنت ممكن اهديك كلامي
لو كنت واضح وجيت امامى
ورغم ذلك اهديك سلامة
أنا مش راح أندم ولا لحظة أغير
أنا عندى نهر من الفنون
لا عمره ينضب ولا يوم ح اخون
لاني عارف انا مين أكون
على كل غصن دايما اطير
في كل موقف عندي قصيدة
وبالمناسبة اجمل وليدة
وان يوم تشوه تفضل فريدة
أصل الحكاية فكر وغزير
نستنى منك أعمال جديدة
تنم عنك تبقى فريدة
مش رص كلمة وقافية بليدة
ونفسي أشوفك اديب كبير
سارق كلامي
اهديك سلامي
ونفسي أشوفك
كبير امامي
أو حتى تبقى اديب كبير
*********
جمال على الشرقاوى
شاعر العامية
مليج منوفية
ليست هناك تعليقات:
إرسال تعليق