أغنيات على الشط
شــط الـهـانـوفـيــل
...
على شط الهانوفيل
خدني الشوق لهناك
وهناك شفت حوريه
بتبلبط فى المية
وتقول أنا سويسية
فى العوم باتحداك
****
مين قدي مين قدي
وسط الموج أنا أعدي
ضربة ايد مع رجلي
زي صاروخ فتاك
****
قلتلها شـرفتي
وفى شـطي نورتـي
قالتلي قوم انزل
ليا كـلام وياك
****
قالتلي شوف قـدي
تحت الموج بيعدي
قلتلها طـب هدي
عند الصخره هناك
***
وقعدنا نتسابق
والموجه أخدتنا
ترفعنا بحنية
وبحـب تـهدهدنا
وصوت م المية يقوللي
حـلوه الدنيا معاك
***
وقعدنا ع الصخرة
مع نسمة عصرية
والنسمة تـوشوشـنا
بكلمة حـب شقية
نتكلم بالهمسة
والعين ويـا البسمـة
لـحد الشمس ما غابت
واحنا لسه هناك
***
ونزلنا فى المية
والموج يلعب بـينا
قرب الشط سابتني
بأكمل غناوينا
والبنت السويسية
تركتني فـى المية
قالولي يا روح قلبي
بكره أنا ح استنـاك
رفعت محفوظ-اسكندريه
ليست هناك تعليقات:
إرسال تعليق