(((((سعاد)))))
------محمودعمارالزلبانى
»»»»»»»»»»»»»»» ٪
زغرتي يا أم حمدي
مرتب بعلولنا زاد
وبقيت مرات الأفندي
والعريس جانا لسعاد
ــــــــــــــــــــــــــــــــ
مرتب ينقبض بالفيزة
والعيشة أخر تمام
كل شهر ينقص بريزة
وعلى وشك ربط الحزام
ــــــــــــــــــــــــــــــــــــــ
الفقر عارف صحابه
لوغابوا عنه يناديهم
يا دوبك سطر ف كتابه
توهم حتى ف ناديهم
ــــــــــــــــــــــــــــــــ
وعيش البطاقة يا خالة
مكشر فى وش الزباين
مع إن كله نخالة
العجن بس اللي باين
ــــــــــــــــــــــــــــــــــ
عريس لزقة وحلنجي
قبل ما نسمي نلاقيه
يا رب سلم ونجي
مكبر منفض إيديه
ـــــــــــــــــــــــــــــ
البنت كرهت قدومه
تشوفه تقلب قورتها
لو شمت ريحة هدومه
تجيب اللي كلته ساعتها
ـــــــــــــــــــــــــــــــــــــ
البنت قالت لأبوها
إوعاك تميل لي بختي
مع إن كتير طلبوها
دا ليه ف البحر يختي
ـــــــــــــــــــــــــــــــــ
الأب حاب المظاهر
ع الهلف وافق قوام
بخيل والبخل ظاهر
والله يا با حرام
ــــــــــــــــــــــــــــ
الأم قالت يا راجل
سعاد ديا حيلتنا
لازمها راجل وكامل
مش حد لازق فى بيتنا
ـــــــــــــــــــــــــــــــــــــ
يا ستي هو المناسب
متريش وعنده فلوس
وأبوه صاحب مناصب
حسداه كل الرؤوس
ـــــــــــــــــــــــــــــــــــ
أنا بنتي مش رمية
ولا عالة نكل بيها
دول شلة حرامية
تعيش كأنه سا بيها
ــــــــــــــــــــــــــــــــ
يا بويا ليه بايعني
أنا بايني مش ضناك
من حقي ليه ما نعني
ليه ناوي ترميني هناك
ـــــــــــــــــــــــــــــــــ
يا سعاد بلاش الدموع
ربط لساني الكلام
كلام ما فهش رجوع
ما ترميش عليا الملام
ــــــــــــــــــــــــــــــــ
عريس طالبك لحالك
لافرش ولا حتى هدمة
طريقه فاضي وسالك
وناوي يقدم لى خدمة
ــــــــــــــــــــــــــــــــــ
مفيش باليد حيلة
ولازم أنفذ كلامك
فرحانه وكنت حيلة
وغصب عنى ملامك
ــــــــــــــــــــــــــــــ
يا بوي فكر وشوف
المال مش هو السعادة
ولا عمره غير ظروف
للهم أصبح زيادة
ـــــــــــــــــــــــــــــــــــ
سعاد يا بنت ضهري
تهون الدنيا عشانك
وحياة فجري وضهري
ما أقلل أبدا بشانك
ـــــــــــــــــــــــــــ
يا عريس الغبرة –بره
لو جبت حاجة تا خدها
البنت بنتي وحرة
نصيبها قاعد يخدها
ـــــــــــــــــــــــــــــــ
زغرتي يا أم حمدي
بعلولتي رجعت دماغه
بعد ما كان فى وادي
بغزه تجيب له داغه
ـــــــــــــــــــــــــــ
سعاد يا بنت بطني
أبوكي راجع صوابه
ياما زود رغيي ورطني
تسلم لي عمةجنابه
»»»»»»»»»»»»»
=محمودعمار الزلبانى
ليست هناك تعليقات:
إرسال تعليق