ناس طيبة
بقلم... مجدي الجندي
شايف ناس
بساطتهم فى لمتهم
وعزوتهم وقعدتهم
يقوموا الفجر
مع نورها
وع الفرنة
يقيدوا نارها
شقشقتهم
ادان وصلاة
وفرحتهم
تحسها
ماليه سكتهم
وعجيننهم
عيش ريحته
ماشاء الله
على الطبلية
تفوت الرايحه
بصباحها
وتيجي الجاية
لفرحها
وخبيزهم
دا يامحلاه
رقاق ماشي
تقول جلاش
وفطيرهم
فى رقة شاش
وزبدة وسمنة
فى صينية
تبصلها
على الطبلية
فى صنع فطيرة
محلاها
مين اللي فردها
وسواها
تبصلهم على ايديهم
تشوف الخير
فى عينيهم
هاتولي ناس ..
من دولا
طيبة قلبهم جنة
وعزوتهم تكون لمة
اشم ايديهم تشبعني
Magdy ELgendy
ليست هناك تعليقات:
إرسال تعليق