هذه الكلمات تعبيرا عن مشهد من مشاهد فيلم (المواطن مصري) عندما اضطر البطل الى انكار معرفته بجثة ابنه الشهيد خوفا من العمدة الظالم والتي أقامها منتدى المحكيات في أطار الفعاليات الثقافية التي يقيمها المنتدى
========/=========
بقلم/ رجاء حسين
كان السؤال لو تعرفه؟
ابنك يا عبد الموجود؟
انطق وقول الحق
المصري ابنك ولا لأ؟
المصري ابنك؟ تعرفه؟
ليه السكات؟ ابنك ومات
انطق وقول ابنك شهيد
أنا نفسي أصرخ أاااه الا أعرفه؟
٠٠٠٠٠٠٠٠
الا أعرفك؟ وأنا كل نقطة دم في بتجري فيك
ألا أعرفك؟
يا ابني ووحيدي وصوت وريدي بيناديك
الا أعرفك؟
وأنا عشت ليه؟ من يوم ما شفتك عشت ليك
أااااه يا ابن عمري وأااااه يا ابن قلبي
ياللي روحي عايشة بك
يا ضنايا موتك هزني وفراق عيونك هدني
سامعك بتصرخ ضمني
ودع وحيدك مد ايدك
باقي ايه يتخاف عليه؟
٠٠٠٠٠٠٠٠٠٠
كان عقلي فين لما بادلتك بالورق؟
ورضيت أبيعك بالرخيص؟
لحظة ضياع وأهو ضعت مني رغم اني عليك حريص
طب أعمل ايه؟
انطق وقل لي أبوس ايديك؟
سامعك أنا
سامعك بتصرخ ولضميري بتندهه
٠٠٠٠٠٠٠٠٠٠
صوت صرختك بيصحي موتي من حياة مالهاش لزوم
أنا شفت في عيونك كلام ودروب سلام
تحضن وطن ذكراه تدوم
قريتنا هي أمنا وفي كل فرح تلمنا
وبحبها تضلل علينا كلنا
وفداها أنا راح أموت شهيد والشهادة مجد لينا
حتى لحظة فخر وكان تمنها عمرنا
استكتروها ليه علينا؟
٠٠٠٠٠٠٠٠٠٠
حقي اتسرق عمري اتسرق مجدي اتسرق
مش انت امي؟ وكان من حقي فيك أعيش؟
ولا أنت بس ولادك شرشابي وكل ويش؟
خيرك ومجدك لهم ولنا احنا مفيش؟
الخير ده من ربنا للسادة والدراويش
والعدل شرع الله يا أمنا الغولة
العدل بين الولاد والقسمة مقبولة
٠٠٠٠٠٠٠٠
فرقت بينهم ليه حتى في ضريبة دم؟
مش شايفة ابنك ليه؟ قدام عنيك اتظلم
عرقك ده عالجبين من التعب والهم؟
ولا دي صح دموع من حال يغم الغم؟
تبكي عليهم ليه؟ كل اللي رايداه تم؟
ابني اللي عشقك أهو راحت حياته عدم
لكن ما نابه منك غير الوجع والذم
٠٠٠٠٠٠٠٠٠٠٠
حقي اتسرق عمري اتسرق اسمي اتسرق
حتى رزقي في الشهادة بيتسرق
ياااااااه !
لسة دوبك منتبه للي اتسرق؟
ما احنا على طول مسروقين
٠٠٠٠٠٠٠٠٠
وانتبهت بيسألوني: اللي مات ابنك صحيح؟
اسالوني أنا لو كنت حي؟
ده أنا مت ١٠٠ مرة
وفي لحظة قلت: ياريت يا ريت دفنوني بالمرة
يا ابني الشهادة حياة وعالجبين غرة
بس الجبين في الطين من قهر ناس واطيين
بيعيدوا في الكرة
نلقى نفوسنا في الهم غرقانة للعدل شرقانة
وحلمها المبتور تعيش حياة حرة
مين فرعن الفرعون خلاه يدوس البشر
قال اللسان مخروس
جوه الذليل محبوس
لكن يا ويله الويل
لو يوم طلع بره
طول ما احنا كده ساكتين ولذلهم قابلين
تبقى الحياة مرة
رجاء حسين
ليست هناك تعليقات:
إرسال تعليق