إحنا بنحب بلدنا وناسها الطيبين
أولاد خلف بلدنا فى القلب قبل العين
مشتاق لتاريخ زمان ومهما تمر السنين
حكايات قديمة م الماضى ويرجعنا الحنين
أيام طفولتنا كانت من أجمل ذكرياتنا
العيشه بسيطة فيها دي أحلى سنين حياتنا
سنين مرت علينا أحداث محفورة فينا
الدنيا زمان بسيطة واللمه بتحلى بينا
فاكرين وابورات الجاز واللمبات الإزاز
وكلوبات فى الشوارع وأبواب من غير ترباس
ونجيب من الحاج حسين بخمس قروش حلاوة
إن كان ملبن يا سلام يبقى أحسن م البقلاوة
حتة بتعريفة هريسة وقرش وشلن وبريزة
روح هات من نينتك لبن فى القسط أو فى وعاية
والقله جنب الزير والميه منه حكاية
نفطر بعيش وفطير والعجوة فى المقلاية
ونستحمى فى طشط والميه فى الغلايه
حاملين قش من الغيط وسباخ فرن و لوايه
وسلطانية فول واتوصى مش بالقول
وكماج لبن معمول بعد الفجر ما يقول
ولحاف قطن بيدفى فى الشتاء والباب مقفول
فاكرين يوم العيد وفرحتنا بسوق العيد
مراجيح خشب وحديد تنطيط ولبس جديد
والدنيا حلوة جميلة
شربات منقوع وبليلة
نشرب فى العيد كوكاكولا
بعد ما ناكل مرغوله
فاكرين كلمة كازوزة
فاكرين رَهن الإزازة
والترعه والزغلولة
والتوته والجِميزة
جَلاوين مع الخُبيزة
وكَافور على الجانبين
صفصافة وجَزوَرين
وحصير وسِدَد وكليم
والساقية دايرة على المدار
والبقرة معصوبة والحمار
والميه تجرى فى القناية
والفلاحين أخر النهار
راجعين بيوتهم مهلوكين
يتعشوا مع بعض مبسوطين
وعيال حارتنا ملمومين
على الموقدة فيه حلة مدفونة
وفحل بصل مدشوش ولمونه
والمحشى مكفى على الطبلية
وعيال كتيرة مستحمية
وأفران عليها فرشة قش
وكيزان ذرة فى البيت تندش
وعيش طرى وسِريس ومش
وفرن بلدى يدفى ضهرك
وأكلة دافية وسط أهلك
وشرب شاي فى حته ضلة
الضحكة راحت ويعلم الله
العيشة كانت زمان بسيطة
ودولابنا كان مسامير ع الحيطة
نصطاد من ترعة جنب الغيط
يطلع سمك يخرج قراميط
نشويه يطيب ومرة يشيط
وخَبيز زمان فى فرن بلدى
يِملَى السحارة عيش يا وَلَدى
والفرن حَامى عند أم سَامى
ومجور عَجين خَمران وفايض
ومطرحتنا ودراجتنا شحتاها جارتنا
ولواية قش وبلاصى مش
وعيال الحارة ملمومة فى البيت
حنون سكر معمول بالزيت
وكوز بطاطا ورغيف شحاته
مدرستى كانت الإبتدائية
أولاد خلف الإبتدائية
والدنيا هيصة وعيال شقية
وجرسها جنب دورة الميه
الجزمة كانت سودة برباط
وقميصى كان أزرق كاروهات
والشنطه تبقى قماش متخيط
سنه أولى فى أول يوم بتعيط
أدواتى كانت زمان بسيطة
وحلمى كان أستيكة بريحة
أو حتى كان براية بمراية
فى الشتا نخرج لابسين دبابه
ونروَح من ع البوابه
فى الشمعه نسهر على واجباتنا
والجمعة أجازتنا وفرحتنا
وزمان دا تاريخنا و حكاياتنا
بقلم
محمد عبدالوهاب العيوطي
ليست هناك تعليقات:
إرسال تعليق