*******الحارة *******
عطفة فى قلب حارة والناس بسيطة جدا
اليوم هناك يبدء ساعت ماالظهر يدن
تسمع بياع ينادى وصوته كله نشاذ
وكورة شاطها حمادة وتكسر الازاز
وام عبده تشتم وتقول مافيش رباية
وام حمادة صبرك لما البس العباية
وعركة تقوم فى ثانية من الظهر للغروب
وتجرى وتستخبة الدنيا بتشتى طوب
وواد ببسكلته يخبط راجل كبير
والراجل مع انه جته كانه وقع فى بير
وتتلم الناس بسرعة وياخد من بصلة جرعة
ويفوق يصرخ يهلل ياعم ده برده عيل
وشجرة جنب مقهى وتحت منها زير
وفى قلب منه قطة للمارة بتستجير
والزير اصله فاضى والقطة رماها عيل
ماكنش عنها راضى واستنى الليل يليل
وواحد عامل كبير والكل يسمع كلامه
وهو اصله جاهل ماكملشى علامه
والقدوة لشخص ضايع وبطولة لكل صايع
وعلى كل ناصية عاركة والفاظ صعبة جدا
وديك معدوم الضمير وقت العصر يدن
وشباب عالناصية واقفة من طلعة النهار
وبنات تعدى خايفة ومافيش اى اعتبار
وعيون فى كل حائط وفى كل ثانية زيطة
واسماء غريبة جدا رينجة وفسيخة وشيطه
وكلب ينام فى حاله يحدفوه بالطوب
ومربوط بالحبال عياله وكأن تكفير ذنوب
وحمار ماشى ينهق من كتر الحمول عليه
وتقول لصاحبه حرام يقول اعمله ايه
وتسمع طبل وهيصة معدى عفش عروسة
ووحدةتقول عفش جميل اخر موضة
والتانية ترد كله جميل عدا الاوضة
كان احسن منه عفش ثناء بنت الصول
ياختى خطيبها مرتبه حلو اصله موظف فى البترول
ولما العفش يخش الشقة ام العريس مخنوقة متدايقة
بس فلانه كان ايه جابها
بصو عينيها حابس حابس ورافعة حاجبها
عندى مبخرة هاابعت اجيبها
ياحارة فيكى الف لون كأنه معهد للفنون
والعقل فيكى عايش بربعه الباقى عرضة للجنون
فيكى الربيع وياالخريف فيكى الشتاء موجود وصيف
فيكى الظنون فى كل حاجة والاكيد كأنه ضيف
فيكى الحقيقة والخيال فيكى اللى ممكن والمحال
العيشة فيكى بالفراسة يعنى الخلاصة كل حاجة ارتجال
ولو تركب سيارة اجرة ولافيها زجاج ولا اكرا
سواقها ماشى مغيب وماعنده ايها فكرة
ويسمع شطة وكاريكا والاسطورة حمو بيكا
ويشيل ويحط بيكا وكأنو فى كوستاريكا
والتوكتوك كارثة سودة ياشهادة ياأمة عودة
وسواقة اساليبه عوجة وواد عمره عشر سنين
وتقوله بالراحة يابنى انا الغضروف تاعبنى يقول بتقول مين
وتغضب وتديله شخطة يقولك ياعم حاسب
ياتركب وانت ساكت ياتقول كلام مناسب
وكله خلطابيطا وساقطين من عالخريطة
مع انها بسيطة ونغامتها زمبليطا
اصل الحارة زمان كان فيها الناس تمام
وكان الجار لجارة من شدة احترامه ينحناله فالسلام
ياخسارة ومليون خسارة الجهل فى كل حارة
عايزين حوارينا ترجع والجهل يستخبة
والناس بقلوبها تسمع ويعيشو بالمحبة
وعطفة فى قلب حارة والناس بسيطة جدا
واليوم هناك بيبداء ساعت ماالظهر يدن
*****************
ابراهيم على
ليست هناك تعليقات:
إرسال تعليق