مزاد علني
اليوم فتحت المزاد على كل شئ غالى
اصبح ملوش تمن
على الآلام والجراح وغدر الصحاب وقلب انكسر
واحد اتنين تلاته
الا اونا الا دو الاتريه
نبدأ باول شئ
قلب صافى حب بإخلاص ووفا قلب يتاقل بالدهب كان كل همه يسعد حبيبه ويكبره ويشوف الفرحة فى عيونه وكان ده هوالامل لكن ياعيني خانه حبيبه و انكسر مين يشترى مين يرسى عليه العطا
مين قال هات مين قال اشترى
الا اونا الا دوا الا تريه
مين ياخد قلبى ويجبره يمكن يقدر يرجع له الامل ويداوى فيه الالم ىمكن يقدر يعيش تانى وينسى الألم
ما فى حد راضى يشترى
الا اونا الا دو الاتريه
طب نبيع شئ تانى يمكن نلاقى حد يشترى
بنبيع عمر عدى وفات من غير تمن فنيته كله من اجل الاحباب وكان نتيجته قسوة وقهر من غير سبب
الا اونا الا دوا الا تريه
مين قال هات مين قال اشترى
برضوا ما حد عايز يشترى
.طب بنبيع صداقة كنت فيها الخل الوفى كنت سند وقت الضيق وايد تطبطب ع الالم وتمسح دمع العين
وتفرح قلب حزين
بس ياخسارة كله ضاع من غير تمن
غدر الاصحاب وباعوا العشرة بارخص تمن
الا اونا الا دو الاتريه
مين قال هات مين قال اشترى
برضوا ما حد عايز يشترى
يا خسارة ع الناس ال ما عايزة تشترى
حب واخلاص وصداقة ووفا
كل غالى خلاص اصبح ملوش تمن حتى ولا بارخص تمن
الا اونا الا دوا الا تريه
خلاص خلص المزاد على بضاعة بارت
وملهاش تمن
كان نفسى الاقى حد يشترى كل غالى ولو بارخص تمن
ولكنها اصبحت اشياء قديمة فى ايام غريبة الغالى فيها ملوش تمن
ليست هناك تعليقات:
إرسال تعليق