الوصفة المرتاحة للردعلى أهل البجاحة
دي وصفة سهلة كتير آهي
مرفق فيديو تجهيز الوصفة للمعجزة الجميلة جنا
إعداد / رجاء حسين
===========
لما تشوف الناس البجحة
دايما تلج كده ومرتاحة
تتمنى ترد ومش عارف
تتعامل مع أهل وقاحة
وأما يشوفك كده إيه ساكت
تلقاه يزيد في كلامه بجاحة
فاكرك يعني عويل ولا أخرس
قال إيه يعني فاكرها نصاحة
مش فاهم إنك متربي
وإن في طبعك ذوق وسماحة
طيب نتكلم بصراحة
حضر حالا ورقة وقلمك
ونشوف الوصفة السحرية
للرد على كل بجاحة
----------
ربع برود على نص كلاحة
مع كيلو إلا ربع تناحة
وارميهم في قِدر صراحة
وتقلب فيهم ---- بالراحة
ساعة ونص على نار هادية
تلقى الريحة بقت فواحة
وأما الطبخة تِهدى وتبرد
كورة كورة وترمي في جيبك
--------------
وأما يقابلك مرة الحِشَري
دوَّر وشك خدْ لك كورة
جمِّد قلبك ولا تتحيَّر
تنَّح زيُّه وخُدْ له الصورة
وارجع له بوشك متغيَّر
من غير النظرة المقهورة
رُد عليه بكلام يستاهله
يبعد مناخيره المحشورة
ده اللي ما اتربى من أهله
ربيه أنت بوصفة في كورة
=============
وإلى اللقاء في وصفة جديدة
دمتم بخير وأرق تحياتي
رجاء حسين
==========
لكل الأصدقاء اللي سألوا عن سر الوصفة المرتاحة تعالو نشوف الجميلة جنى وهي بتجهزها في مطبخها الجميل
https://www.youtube.com/watch?v=e01SKhjPtuU&feature=share&fbclid=IwAR31qWuo1Pp9Eht8k3Xx6RWzO_mDMkGERtkoU7QhoR0h-sZ7kZQYtK_Nwdw
ليست هناك تعليقات:
إرسال تعليق